Chief Minister Pu Zoramthanga chuan zu leh ruihhlo in min tihbuaina a lo reh a, ram hausakna thiam taka hmang tangkaia, mipui hausakna tipung turin hmalak a nih tur thu leh, chumi atan chuan mitin kan zavaia kan tanho a pawimawh, a ti. He thu hi vawiina Ramhlun Venglai Local Council leh Joint NGO ten Pu Zoramthanga Chief Minister a nih lawmpuina leh chawimawina inkhawm an buatsaihah a sawi a ni.

Chief Minister Pu Zoramthanga chuan khawltlang leh tlawmngai pawl hruaituten amah lawmpuina inkhawm an buatsaih chu ropui a ti a. Sawrkar term thar ah kawng hrang hranga hmasawnna hna thawk tura chak taka hma lak nghal a nih thu a sawi. Ram hmasawnna chu kawng tha neihah thui tak a innghah avangin National Highway te enfiah in, kawng siamthat ngai hrang hrangte chu a theih chen chen fur intan hmaa kutthlak theih nan kum tharah hmalak a nih tur thu a sawi. Pu Zoramthanga chuan zu leh ruihhlo do turin tha thara hmalak a nih tur thu sawi bawkin, ruihhlo ngaite enkawlna siam belhna tur hmun remchang te enfiah a nih tawh thu a sawi a. Theihtawpin YMA, kohhran leh mipui tawiawmna nen sawrkar chuan hma a lak tur thu leh, hrem ngaite chu thlei bik nei lovin dan angin an chungthu ngaihtuah zel a nih tur thu a sawi.

Vawiin inkhawm hi Pu Lalbuatsaiha, Ramhlun Venglai Local Council Vice President chuan kaihruaiin, Local Council, YMA, MUP leh MHIP atangin CM Pu Zoramthanga hi chawimawina thil hlan a nih bakah thusawi hrang hrang ngaihthlak bawk a ni.