No.7775/2020-2021

Vawiin khan Assembly Conference Hall-ah MLA te pualin tunlaia India ram leh Mizoramin natna kan hmachhawn lian ber pakhat Ngawr (Tuberculosis) umbo tura beihpuithlak a nih dan leh hun buatsaih a ni a, he hunah hian sawrkar hnathawk hotu lian te an tel bawk a ni.

Vawiin inzirtirna hunah hian India ram leh Mizorama Ngawr natna dinhmun tarlan a ni a. Zirchianna atangin India ramah nitin Ngawr natna vei thar mi 6000 awmin mi 600 vel thi ziah ang an ni a. Mizoramah chuan kum 2015-2020 chhung khan TB natna vei hmuhchhuah 14639 ( 2015 ah mi 2088, 2016 ah mi 2149, 2017 ah mi 2508, 2018 ah mi 2602, 2019 ah mi 2996, 2020 ah mi 2296) an awm a, kumtina vei hmuhchhuah atanga enkawl dam zat hi kum 2015 ah 85%, kum 2016 ah 86%, kum 2017 ah 88%, kum 2018 ah 85%, kum 2019 ah 93% leh kum 2020 ah 78% an ni. Ngawr natna vei zinga HIV positive awm zat hi kum 2020 khan 13% an ni a, hetih lai hian national average chu 0.22% a ni a, India ramah kan dinhmun a chhe ber a ni. Ngawr natna thihpui hi kum 2015 ah mi 38, kum 2016 ah mi 35, kum 2017 ah mi 29, kum 2018 ah mi 51, kum 2019 ah mi 56, kum 2020 ah mi 49 an ni.

Mizoramah chuan Ngawr natna umbo kawngah Mamit district in ti tha berin tunah hian TB Free Certification ah Bronze medal category dawng turin endik mek an ni a. District thar 3 leh serchhip District tih loh District dang 8 ah District TB Centre awmin anti-TB drugs a thlawna pekchhuah reng a ni.

Vawiin inzirtirna hunah hian WHO Sustainable Development Goal-ah kum 2020 ral hma a TB natna umbo a tum laiin India ramah chuan kum 2025 ral hmaa umbo tum a nih thu sawi niin hemi atana ram hruaitu MLA te tanlak theihna tur kawng chi hrang hrang sawiho a ni.

Vawiin inzirtirna hun hi Health & Family Welfare department Secretary Pu R. Lalramnghaka'n kaihruaiin, State TB officer Dr. Zothankhuma Chhakchhuakin zirtirna a pe a, MLA te an tel kim hle a ni.