Nimin chawhma dar 11 khan Aizawl District Fire Prevention Committee huaihawtin Fire Prevention Campaign hawnna inkhawm Aibawk Community Hall-ah hman a ni a, hetah hian Aizawl District Deputy Commissioner Pu C. Thanchhuma, he ADFPC Chairman nibawk chu khuallian a ni a. He inkhawm hi BDO Aibawk Pu Nghaka chuan a kaihruai a ni.

 

 

Hawnna inkhawmah hian thu sawiin Pu C. Thanchhuma chuan, ram kangin nasa taka hlohna a siam theih chi hrang hrangte sawiin, “Ram neitu chuan ram kang tur venhim hi kan mawhphurhna a ni, ram dang, state dang miten kan ram min ven sak dawn lova, keimahni mawhphurhna liau liau a ni” a ti. Pathian-in Mizote tan Mizoram min pek kan venhim a tul a, kumin thalah phei chuan ruahtui tlak loh vangin kangmei chhuah theihna a tam em em a, darkar 1 chhung lekin ram tih chhiat theih anih laiin, ram tha siam leh tur chuan kum tam tak a ngaih thu a sawi bawk.

Pu Lalbiakthanga, S.P. Aizawl District, he committee a member nibawk chuan, ram kang venhimna kawngah hma a lo lak ve thin tawhte sawiin, “thu tha hian kan thatna tur kan inhrilh hnem hle tawh a, kar khata vawi khat tal Pathian thu ngaithlaa inkhawm thinte hian kan nunah kan tih lan theih thin loh ang chiahin sawt lo a awm leh thin, chuvangin tun hnuah chuan Aizawl District khawi hmunah pawh ram tikanga mi dangte harsatna siamtu chu kan dim dawn lo, case kan siam sak ang a, kum 3 atanga kum 7 thleng tan bakah lei chawi tir turin hmun hrang hranga O.C. te pawh ka hrilh tawh” tiin ram ti kangtute chu engtikawng mahni dim an nih dawn loh thu a puang.

ADFPC member dang Pu Thankhuma, District Agriculture Officer chuan ram  kangin lei tha a tih chhiah dan te, chumi ti tha leh tur chuan kum tam tak, sum tam tak senga beih a ngaih thin dante leh loneitute tan a ram kang pawi dan chi hrang hrang a tarlang.

Pu Lalthangliana Murray, DFO, Aizawl District leh he Committee Member Secretary nibawk chuan LCD Projector hmangin ram kang chi hrang hrang awm thei te, ram kangin a tih chhiat hlut zawng te, ram kanglo tura inven dan hrang hrangte a entirin a sawifiah a, mipui kalkhawmte chu ram kang ven chungchangah Forest Deptt. te kutah dah mai lova, a neitu an nihna anga tan lakpui turin a sawm bawk.

VCP, Aibawk chuan ADFPC ten an khua-ah campaign tanna an neih chu lawmawm a tih thu leh Aibawk khua chuan ram venhim that lawmman certificate leh pawisa fai Rs. 4,000/- nikum lamah an lo dawn thu te, ram kang ven chungchangah nasa lehzuala hmalak an tum dante a sawi bawk.

ADFPC Member, Fire Deptt. S.P., Horticulture DHO, ASO I, BDO Tlangnuam, BDO Aibawk leh Dy. Director, I & PR te he hunah hian an tel a, ram dinhmun thlir nan Hmuifang tlang thleng hawnna inkhawm banah an fang a, nizan khan Aizawl an rawn lut leh a, Aizawl District khaw thenkhatah campaign chhunzawm leh turin an member-te hi an zinchhuak leh dawn a ni.