Pu Lalthangpuia Sailo, Commissioner/Secretary, Animal Husbandry & Veterinary Department chuan Vawk natna PRRS chungchangah leh hunpui lo thleng turah mipuiten vawk hrisel tha kan ei theih ngei nan a hnuai ami ang hian thuchhuah a siam.

Mizoramah Vawk natna Porcine Reproductive and Respiratory Syndrome(PRRS) leh African Swine Fever (ASF) a lo luh loh nan leh vawk vulh a eizawngtute hmakhaw ngaia an hamthatna tur rilru a ngaihtuah chunga ram dang atanga vawk lakluh khapna hun eng emaw ti chhung kalpui mek chu mipuite'n tha taka an zawm avangin tun thlengin Mizoramah PRRS leh ASF te a la leng lova, mipuite tawiawmnaah AH & Veterinary Department chuan lawmthu a sawi tak meuh meuh a ni. District Magistrate leh Mizoram Police te, Assam Rifles te leh BSF leh Custom duty leh NGO te'n theihtawpa min tawiawmnaah Department chuan lawmthu a sawi tak meuh meuh bawk a ni.

Hunpui a lo thleng dawn hnai a, vawksaah nasa takin kan intodelh dawn lo tih hriat a nih avangin mipuite harsatna tawh theihte hriatthiam puiin Mizoram Sawrkar chuan heng harsatnate a lo kian theih nan hetiang hian ruahmanna a siam a ni:

1. Ram dang - Myanmar, Bangladesh, etc. atanga vawk leh vawksa atanga ei tur siam chi hrang hrangte chu khauh leh khawng taka khap chhunzawm zel a ni.
2. India ram state dang, PRRS leh ASF len lohna hmun atang chauhin vawk hi lakluh phal a ni. A lalut turte chuan a hnuaia tarlante hi an zawm tur a ni:
a) Director, Commerce & Industries hnen atanga vawk lakluh phalna dil tur reng rengin Director, AH & Veterinary remtihna an la hmasa tur a ni.
b) Vawk puitling talh tur chi chauh lakluh phal a ni.
c) Vawk lalut turte hian an lakna/leina tur farm atangin Proper Soundness Certificate, Registered Vety Practitioner siam an nei ngei tur a ni.
d) Vawk lalut reng rengin AH & Vety Department Check gate - ah an document te an endik tirin, an vawk lakluhte hriselna an exam tir leh ngei ngei tur a ni.
e) Vawk lalut reng rengin an lakluh zat leh lakluh ni chiang taka ziakin Director, AH & Vety hnenah an hriattir ziah tur a ni.

3. He ruahmanna hian official Gazette-a chhuah a nih atanga January ni 31, 2020 thleng a huam ang.

He ruahmanna siamte hi vawk lalut turten an ngaipawimawh in, an zawm theuh tur a ni.