Vawiin khan All Mizoram Farmers Union (AMFU) chuan Ministry of Science and Technology hnuaia Vigyan Prasar leh Ministry of Agriculture hnuaia Central Institute of Horticulture, Nagaland te nena tangkawpin National Workshop on Green Revolution in Mizoram chu Art &Culture Auditorium-ah a thleng a. Chief Minister Pu Lal Thanhawla’n vawiin chawhma khan Workshop hi a hawng.

Chief Minister chuan Mizoram mipui tam zawk, za zela 60 vel hi thingtlanga khawsa, kuthnathawka eizawng an nih avangin an khawsak a harsata, an retheih chhung chuan ram sum leh pai dinhmunin hma a sawn tak tak thei lo tih sorkar chuan a hria a, an dinhmun chawisang tur leh lei rem an rah theihna tur kawng dapin sorkar chuan ram hmasawnna tur ruahmanna tam ber hi a duang a ni, a ti. Pu Lal Thanhawla chuan Mizoram chu thlai chi tinreng that duhna hmun, ruahtui dawng tha leh sik leh sa mumalna ram anih avangin Agriculture leh a kaihhnawih eizawnna kawngah hmabak eng tak a nei a, lo leh thlai huan neia eizawng te hian tihtakzeta an thawh phawt chuan mahni intodelh State nih hi thil harsa a nilo, a ti. Kut hnathawktute dawm kan nan leh pi leh pu atanga Mizo te loneih dan Jhum Cultivation nuaibona tur ni pah fawmin New Land Use Policy (NLUP) chu sorkarin chak takin a kalpui tih Chief Minister chuan a sawi a. Kut hnathawktu ten hah leh rim taka an thawhchhuah atanga hlawkna chhenfakawm an hmuh leh thin loh chungchang pawh Chief Minister chuan tunah chuan loneitu leh huan thlai siama eizawng te chu tunlai thiamna hmanga thar hlawk zawk thawk chhuak thei tura kaihhruai an ni a, an tharchhuah man man zawka hralh chhuah lehna tur pawh ruahman a ni, a ti.

AMFU hian 2008 a General Conference an neih tum khan Green Revolution Mizoramah a thlen theihna tura tanlak an rel a. He an rorel bawhzui hian loneitu (farmer) 200 rual zet telna Conference kum 2010 khan an lo buatsaih tawh a, hei hian Green Revolution em chu thlen rih lo mahse kawng thui tak a sat eng a ni. Tun tum Workshop-ah hian rampum huap Scientist lar engemawzat leh Mizoram chhunga mithiam te sawmkhawm an ni a. An sawm zingah hian Jawaharlal Nehru University (JNU) Professor, Scientist lar tak ni bawk Prof. PS Ramakrishna ; Vigyan Prasar-a Scientist Dr. Sachin Narwadiya ; All India Kisan Sabha Jt. Secretary Dr Vijoo Krishnan ; Dr Parthiba Basu, Kolkata University te bakah Mizoram University mithiam engemawzat an tel.

Nithum awh tur National Workshop on Green Revolution in Mizoram hawnna inkhawm hi AMFU Vice President Dr H. Vanlalhluna’n a kaihruai a, All India Kisan Sabha Jt Secretary Dr Vijoo Krishnan, NABARD General Manager RK Das leh Vigyan Prasar-a Scientist, Dr. Sachin Narwadiya ten thu an sawi a. Thupui thlanbik hmanga zirhona hun nilengin an hmang zui a ni.