Vawiin zing khan AR Ground-ah Rashtriya Ekta Diwas (National Unity Day) hman a  ni a, Deputy Chief Minister Pu Tawnluia chu khuallian a ni.

Khuallian Pu Tawnluia chuan thu sawiin,  India hnam inpumkhatna atana hma nasa taka la tu Sardar Valabhai Patel piancham denchhenin October Ni 31 chu Rashtriya Ekta Diwas (Hnam Inpumkhatna Ni)-ah India sawrkar chuan a puang a ni, a ti a. Deputy Chief Minister chuan Kum 2014 atangin Rashtriya Ekta Diwas (National Unity Day) hman tan a ni a, vawiin hi vawi ruk hmanna a ni, tiin a sawi a. Kum 1917-ah Sardar Valabhai Patel chuan India Hnam Pa Mahatma Gandhi thusawi a ngaihthlak a tangin India hnam tan theih tawp a chhuah a, huaisen taka thawk mi, ‘Iron Man of India’ ti hiala koh thin a ni, a ti a. British in India a chhuahsan dawn khan India lal ram hrang hrang 500 chuang India chunga an awm khawm theih nan hma a la a ni a ti a. Khuallian Pu Tawnluia chuan India zalenna sual chhuaktute zinga mi pawimawh Sardar Valabhai Patel ang hian hnam tana thawk turin leh inpumkhatna vawng nung zel turin kalkhawmte a sawm a ni.

Chief Secretary Pu Lalnunmawia Chuaungo chuan hemi hun hmang tura kal zawng zawng hnenah Rashtriya Ekta Diwas thutiam a chham tir a. Contingent 9- Assam Riffles, BSF, 1st Battalion MAP, 3rd Battalion MAP, 5th IR Battalion, Home Guard, 225 Battalion CRPF, One Mizo Air Squadron NCC, 20 Mizo Independent Company NCC te parade in, Parade Commander hi Inspector PC Vanlalsawma, MAP a ni a, Assam Riffles Band Party ten National Anthem an tum bawk a ni.

Rashtriya Ekta Diwas lawmna a tan hian zing Dar 7-ah sikul naupang 500 ten Sikulpuikawn leh Chanmari atangin Run for Unity neiin, AR Ground-ah an in tawk khawm a ni.