65/2023-2024

Mamit 10th April, 2023 : Vawin khan Rawpuichhip Branch YMA chuan an din champha kum 75-na (Platinum Jubilee) lawmna hun Rawpuichhip Community Hall-ah an nei a. Er H. Lazirliana, Mamit bialtu MLA, Vice Chairman, Road & Infrustructure Development Board, Govt. of Mizoram chu khuallian niin Platinum Jubilee lungphun a hawng nghal.

Khuallian chuan thu sawiin kan ram, khawtlang leh kohhran buaina ber pakhat chu ruihtheihthil a ni a, hemi lakah hian kan ram thalaite kan inthiarfihlim a, huaisen taka kan do ngam a ngai a ni a ti. Malsawmna hi a hun taka dawn anih loh chuan malsawmna a ni lo fova, chuvangin a hun taka dawng thei turin teirei peih, dawhthei leh taihmakna nena kan nun kan hman a pawimawh thu a sawi.

Ram a changkan theihna tur chuan kan ngaihtuahna te a changkan tel ve a tul thu sawiin ram hmasawn zelna turin nu leh pate'n kan fate kan dah pawimawh hmasak ber a ngai a, kan ram hmakhua hi naupang zawk te-ah a innghat a, tan lak thar a pawimawh hle a ni a ti bawk.

Bialtu MLA hian Rawpuichhip khua-a Zirna In hrang hrangte bakah Branch YMA leh VC ramtheh neitute hnenah thilpek a hlan nghal a ni.

He hunah hian Pu H. Lalrosanga, President, Rawpuichhip Branch YMA leh Pu C. Lalduhawma, VCP te'n thu an sawi bawk.

Rawpuichhip Branch YMA hi Kum 1948, April Ni 10 -ah din a ni a, tunah hian Member 685 awmin, Mipa 415, Hmeichhia 263 leh Life Member 7 an awm mek a ni.

Platinum Jubilee lawmna hun hi Pu H. Vanlalzapa, Vice President, Rawpuichhip YMA chuan a kaihruai a. Pu Lalkhawsiama, Life Member chuan hunserh hmangin Tv. H. Lalmuankima, Asst. Secy Branch YMA chuan lawmthu a sawi a ni.