2482/2024-2025

Aizawl, the 11th October, 2024: Vawiin chawhma dar 11:30 khan Reserve Bank of India (RBI), Aizawl Office hotute; Pu T. Lhungdim, General Manager and Officer in Charge; Pu Navin Adarsh, Deputy General Manager; Pu Siddharaj, Manager leh Captain Steve Lalthantluanga, Manager-te chuan Mizoram Governor Dr. Hari Babu Kambhampati chu RBI in mipui rawngbawl hna a thawh kum 90-na tlin puala hmuin an hmalakna leh RBI kaihhnawih pawimawh dangte an sawipui. 

Governor Dr. Hari Babu Kambhampati chuan mipuite'n bank hman tangkai dan leh hemi kaltlanga hamthatna awmte an dawn theih nana inzirtirna kalpui nasat a tul thu a sawi a. RBI hotute chu bultanna tur nei remchanglote'n loan hmanga bul an tan theih nana an hnuaia scheme pawimawh tak takte tun aia nasa lehzuala kawhhmuh thin tura chahin, an service mamawhtute chu panchilha an harsatna leh tanpui theih dan turte chena ngaihtuahpui turin a chah a. Sawrkar scheme pawimawh tak takte chu miretheite chawikan nana duan a nih avangin ngaipawimawha neih tum tura hrilhin, Financial Literacy Campaign in rah tha a chhuah em tih chena enzui thin turin a chah bawk.

He hunah hian RBI hotute chuan Mizorama an hmalakna tlangpuite tarlangin, financial inclusion leh financial literacy campaign an kalpui bakah Lead Bank Scheme priority sector lending hnuaiah target za zela 40 an tihhlawhtlin thute, RBI in Unified Lending Interface (ULI) a ruahman thute an tarlang a ni.

He huna tarlan a nih danin India ram State 10 leh Union Territory 6 te digitise an ni tawh a. Mizoramah chuan Aizawl leh Serchhip District-te digitise fel tawh niin, RBI hotute chuan District dang zawngte pawh digitise tuma hmalak chhoh mek a nih thu an tarlang a. Heng bakah hian Sawrkar scheme pawimawhte mipuite'n hlawk leh awmze nei zawka an chhawr tangkai theih nana hmalak tulte pawh sawi ho a ni.