486/2026-2027

Lawngtlai, 13th May 2026: Vawiin khan Rural Development & Administration Department Minister Prof. Lalnilawma chuan khuallian niin ' Lawngtlai District Panchayat Resource Centre ' a hawng a. Dr. Lorrain Lalpekliana Chinzah Adviser to Chief Minister leh Lawngtlai East bialtu MLA nibawk chuan khualzahawm niin a hmanpui.

Prof. Lalnilawma chuan Lawngtlai District- chhunga Village Council- te leh a mamawhtuten tangkai taka an hman tura lawm taka 'District Panchayat Resource Centre' a hawn thu a sawi a. DPRC - chhawr tangkai turin VC - te an pawimawh hle a, a bik takin Lawngtlai khawpawn lam VC - te tan thlenna leh zan riahna tur tha tak a ni dawn tih sawiin, neitu thinlungpua hmangaih leh duat taka enkawl turin a fuih a. Sawrkar kaltlanga khawtlang enkawltu VC - ten thiamna sang zawk nei tura an ' Training' na tur hmun a nih angin, ram leh hnam tana mi tangkai zawk an chhuah zel a beisei thu a sawi a. Minister chuan sawrkarin VC- te hmakhua a ngai em em a, Mizoram chhunga VC - te tan Aizawlah Khualbuk sak a tul hle tih tarlangin, hemi atan hian ngaihtuahna pawh sen mek a nih thu a tarlang a ni.

Khuallian chuan VC - te inkarah thawhhona tha tak a awm a tul hle tih a sawi a. Khawtlang enkawl kawngah mawhphurtu ber an nih angin, mahni hmasialna dah thaa khawtlang hmasawnna ngaipawimawh ber chunga thawk turin a fuih a. Faina leh thianghlimna kawngah tan lak thar a tul hle tih tarlangin, a bik takin bawlhlawh sawngbawl kawngah mawhphurhna la thar ngam turin VC - te a chah a. VC - ten mahnia thawhchhuah neih ve a tul hle a, hemi kawngah pawh hian ngaihtuahna siam thiam turin a chah a ni. Minister chuan VC - te hnathawh kawng hrang hrangah rintlak leh chhuanawm taka thawh a pawimawh hle tih sawiin, hna tha thawk tura mahni intiam ngam turin a fuih a. VC- te chu kawng enkima a bul thuta hnathawktute an nih thu sawiin, sawrkar department hrang hrangte thawhpui thiam tura chahin, Prof. Lalnilawma chuan khawtlang, ram leh hnam hmasawnna turah sawrkar thawhpui tlat turin a sawm nghal bawk.

Prof. Lalnilawma leh Dr. Lorrain Lalpekliana Chinzah te hian VC - 15 te hnenah Computer set- an hlan nghal bawk a ni.

Khualzahawm Dr. Lorrain Lalpekliana Chinzah chuan sawrkar hmalakna zara Lawngtlai District- tana DPRC hawn a ni chu lawmawm a tih thu a tarlang a. VC - te chu a hmangtangkaitu ber an nih dawn angin, neitu thinlungpu a,hmasawnna atana chhawr theih turin a fuih a. VC Member- te chu khawtlang enkawltu ber leh sawrkar kut leh ke pawimawh tak an nih hre renga ram leh hnam tana theihtawp chhuah zel turin a chah a. Khawtlangin hmasawnna a neih turah party- bik sawi a thianglo tih tarlangin, dikna leh rinawmna nena thawk tlat turin a fuih a. Dr. Lorrain Lalpekliana Chinzah chuan Lawngtlai District chhunga Village Council zawng zawngte khawtlang leh ram tana thawhpuiah a sawm nghal a ni.

Pu V. Lalengmawia, Additional Secretary, RD & AD chuan thu sawiin, VC- te chu khawtlang hruaitu an nihna hriaa, mahni khawtlang bakah ram leh hnam tana theihtawp chhuah chhunzawm zel turin a fuih a ni. Dr. Lalngura Tlau, Director, Dte. of LA,RD&AD pawhin thutawi sawiin, VC leh vantlang mipuiten tangkai tak hmang turin duhsakna a hlan a. DPRC chu Lawngtlai District- chhunga VC - te training - na hmun tur niin, VC- te thuamchakin, khawtlangah hmasawnna thlentu a nih ngei dawn thu tarlangin, duat leh hmangaih taka enkawl turin a chah nghal a ni.

Er. Lalrinmawia, EE, RD&AD chuan ' Technical Report' pein District Panchayat Resource Centre - chu Rashtriya Gram Swaraj Abhiyan hnauaia sak niin, Office Building leh Hostel Building sak nan hian cheng nuai 100 ve ve sen ral a ni a ti, a. Office Building - ah hian Conference Room - 1, Office Room- 1, Meeting Room- 1, a awm a. Hostel Building ah hian Bedroom - 7 awmin khum - 2 theuh a awm a, Choka/ Chawkidar quarters - a awm bawk a ni. A sakna sum hi Ministry of Panchayati Raj atanga hmuh niin, Contractor chu Pu Biakliana & Sons, Sikulpuikawn, Aizawl an ni.

District Panchayat Resource Centre- hawnna inkhawm hi  Pu H. Zonunmaiwa PD (DRDO) chuan kaihhruaiin Lawngtlai District- chhunga  Village Council Member- te, NGOs leh Mizoram sawrkar hnuaia Head of Department - te an telkim tha hle a, Pu S.T. Lalhmingmawia, JD (P)  Dte. of LA,RD&AD chuan lawmthu sawiin hun a khar.