490/2026-2027

Siaha the 13th May 2026: Minister of State (RD&AD) Prof Lalnilawma chuan tukin khan MADC Golden Jubilee Hall, Siaha-ah Rashtriya Gram Swaraj Abhiyan (RGSA) hnuaiah Siaha District chhunga Village Council 7 te hnenah Computer set semchhuahna hun a hmanpui.

Minister of State Prof Lalnilawma chuan kalkhawmte chu chibai bukin tha taka programme buatsaihtute chungah lawmthu a sawi. Langtlang leh tangkai taka hman a nih theih nana a hmun ngeia kalchilha computer te chu VC pasarih (7) te hnenah sem a nih thu a sawi. Sawrkar in online connectivity a ngai pawimawh hle a, vawiina computer semchhuahte chu a tangkaina hmang chhuak thei turin inthuamchak a ngai a, khawvel hmasawnna umpha zel tura mahni thiamna tahhriam zel a ngai a ti. Thliarbik nei lovin VC thawkthate thuam chak zel an ni dawn a, district hmasawnna turin mitin thawhho tul a tih thu a sawi. Hmasawnna tluantling a awm theih nan VC te an pawimawh hle a, Grassroot level a institution pawimawh ber an nih angin theihtawp chhuah turin a chah a, Sawrkar atanga engkim beisei lova mahni sum hnar (Own source revenue) nei thei tura hma la zel turin a fuih bawk a ni.

Dr Lalngura Tlau, Director RD&AD chuan RGSA component hrang hrang leh an hnathawh tlangpui sawifiahna a nei a, RGSA hnuaiah computer sem chu a peng (component) pakhat chauh a nih thu te, Panchayat Bhavan (VC House ) sak te, VC te tana capacity building neihpui te, VC te chakna ti punga, ram leh hnam tana an thawhnaah an theihnate thuamchak chu RGSA thil tum a nih thu a tarlang a ni.

Panchayati Achievement Index (PAI 2.0) karleha tlangzarh turah, VC te theme 9 ah intihsiakna an nei leh dawn a, VC tha thlan an nih tur thu tarlangin lawmman dawng thei tura theihtawp chhuah turin VC te a chah a ni.

Pu K Chhuabei, MADC a LAD changtu EM pawhin thu sawiin computer dawngtute duhsakna a hlan a, tangkai taka hmang turin a chah. VC court house la neilo te tan beiseina sang tak an nei tiin VC house mai bakah tunlai khawvel thang chak tak maia tangkai em em computer an sem leh hunah Siaha District lo duhsak Ieh turin Minister a ngen bawk a ni.

Addl Secy ,RD&AD Pu V Lalengmawia pawhin computer set an sem tak te chu tangkai taka hmang turin a chah a, computer an dawn rualin VC te pawh in upgrade zel turin a chah bawk a ni.

Rashtriya Gram Swaraj Abhiyan (RGSA) chu Centrally Sponsored Scheme niin Ministry of Panchayati Raj, Govt of India hnuaia mi a ni a, ram pum huap khawtlang inrelbawlna tihchakna tura hmalakna a ni.

Vawiin hun hi MADC Sr LAO Pi S Lalmuanpuii chuan a kaihruai a, Pu ST Lalhmingmawia, JD (P) RD&AD chuan vote of thanks a sawi a ni. Hemi programme zawh hian Minister chuan Siaha District Panchayati Resource Centre (DPRC) a tlawh nghal bawk.

Minister of State Prof Lalnilawma hi RD&AD Addl Secy Pu V Lalengmawia, Director Lalngura Tlau, JD Pu ST Lalhmingmawia, MZSRLM CEO Pi Zosangzuali Pachuau ten an rawn tawiawm a, Siaha atangin LAD EM Pu K Chhuabei, MADC Executive Secy Pu K Vanlalliana, District Bawrhsap Pu VL Hruaizela Khiangte bakah MADC a hotute leh State official dangte an tel a ni.