Vawiin khan Rural Development (RD) Directorate chuan Parliamentary Secretary Lt. Col Z.S. Zuala hovin an Directorate Conference Hall, Chanmari-ah inhlan tharna hun an hmang a. RD Director Pu Zorammuana chuan inkhawm hi a kaihruai a ni.

Lt. Col Z.S. Zuala chuan RD Directorate a thawktute fuihin hna hniam leh hniam lo a awm lova, mahni hna chanpual tha taka hlenchhuah hi kan mawhphurhna a ni, a ti. Thawhhona tha nei turin inkawmngeih leh inhriatthiamtawnna a pawimawh thu te, hun vawndik pawimawhna te, rinawmna leh taimakna chungchangte sawiin RD changtu Parliamentary Secretary chuan thawktute a fuih a. Thingtlang mi rethei tak tak te hmasawnna tura thawktu, department lian leh pawimawh tak an nih inhria a, kum tharah rilru thar pu in, mahni thlen chin atanga hmasawn tum theuh turin RD Directorate a thawktute a chah a ni.