Nimin tlai khan Excise & Narcotics Office ah Mizoram rawn tlawhtu, United States Ambassador to India Pu Richard Verma chuan Excise & Narcotics Officer lian te a kawm a. Pu Craig L Hall, US Consul General, Kolkata pawh meeting ah hian telin Mizoram Excise Department Official te hi Pu Benjamina, Secretary, END leh Pu Lalhmunsanga, Commissioner, END ten an ho a ni.

Ambassador Verma chuan Mizoram an rawn tlawh chhan chu hmasawnna atana thawhhona tur kawng an rawn dap bakah ruihhlo tawlhruk doletna leh a zuartute hmachhawn kawnga USA leh a thawhpui hmalakna te an rawn belchiang tih a sawi a. Mizoram Excise & Narcotics Department leh Drug Enforcement Administration (DEA), USA ten thawhhona tha tak an lo neih tawh avanga lawmawm a tih thu sawiin Mizoram kaltlanga ruihlo tawlhruk te manchhuah a nih zel theih nan END official te chu tan la zel turin a ngen a. END te nen thawhhona an chhunzawm zel dawn bakah intahhriam nan training exchange programme te nei turin hmalak a ni ang a ti.

Pu Benjamina, Secretary, END pawhin END hmalakna te tarlangin ruihhlo do kawngah thahnem ngaih a nat thu leh staff erawh mamawh aia tlem zawk daih an awm avanga an thawhrim thu a sawi a. Mizoram in international border a neih thui avangin hna a hautak bik tih sawiin Myanmar nena thawhhona neih an tumna te chu tunthlengin Myanmar Official lam atanga tawiawmna a that tawk loh avangin a hlawhtlin loh thu a sawi a. Khawvel hmasawn zelah misual te beilet tura training tha zawk leh ralthuam tha zawk te mamawh a nih avangin DEA nena thawhhona tha zawk neih theih anih chuan END tan a tangkai hle dawn a ni a ti.

END report tarlan dan chuan tun dinhmunah Excise & Narcotisc Department ah enforcement staff 471 an awm mek a; heng zinga 79 te hi Narcotics kaihhnawih ah chhawr an ni.