Vawiin chawhma khan UD&PA Minister Pu Zodintluanga hovin ama Office ah Mizoram sawrkar mi pawimawh te leh company aiawh ten meeting chhawnghnih nei in development project 2 ah thawhonna neih an rem ti.

Meeting hmasa zawkah hian Aizawl khawpui chhunga streetlight chhit mek leh repair loh 5741 chu kawlphetha chakna renchem zawka chhit theih LED lights hmanga thlak vek dan tur sawiho a ni a. Energy Efficiency Services limited(EESL) aiawhin a lem nen plastics waste to hydrocarbon conversion plant sawifiahna hun a hman hnuah hmalak tan dan tur te rel niin thawhhona thuthlung mumal tak duang turin Power & Electricity Department leh EESL chu mawhphurhna pek an ni. Tun dinhmunah Aizawl khawpui chhungah hian 250 W hmang HPSV 2500 leh 80W hmang CFL/ICL/Tube light 3241 chhit mek a ni a. Heng te hi current hehlo leh eng pechhuak tha zawka ngaih, LED lights 90 W leh 40 W ten an thlak dawn a. Maintenance leh current bill a kumtin Rs. 1.9 Crore senral ngai thin chu LED lights hman a nih hnu in Rs.0.60 crore ah tlahniam tura chhut a ni.

Meeting chhawng 2-naah hian Aizawl khawpui leh Mizoram hmun hrang hranga plastics/sarang lam thil chhe tinreng nikhat chhung pawha 20 tonnes chuang fe tling khawm hman thin, tuialhthei siamchhuah nana hman dan tur chungchang sawiho a ni a. Dr.Mahesh Merchant, MD, MK Aromatics Limited chuan a lem nen energy plant a plastic bawlhlawh tuialhthei a chantir a nih dan leh energy plant din na tura thil tul te a tarlang a. Uluk taka sawihona neih a nih hnu in plastics waste to hydrocarbon conversion plant sakna tura hmun dap hmasa tura hmalak phawt leh chumi hnua MK Aromatics Limited leh Mizoram Sawrkar thawhhona kalpui zel dan tur bawhzui turin thutlukna siam a ni.

Meeting ah hian street lights khaina tur te enchiang tur leh Aizawl khawpui chei zawnga street light te chhit a nih theih nan P&E leh AMC te chu joint verification nei tura ruat an ni a. Plastics waste to hydrocarbon conversion plant bunna tur hmun remchang dap hna chu AMC leh UD&PA official te kutah dah a ni. Technical report a tarlan dan chuan plastics waste to hydrocarbon conversion plant hian nikhatah tuialhthei thianghlim sulphur tel lohna leh meikhu bal siam ve lo 10 tonnes aia tam a siam chhuak thei a ni.