Mizoram State Rural Livelihood Mission (MzSRLM) hnuaia Community Resource Person (CRP)-te’n an bial theuh hlawhtling taka an fanchhuah hnuah vawiin khan ATI Conference Hall ah meeting nilengin an nei a.

Rural Development Minister Pu R.Lalzirliana chuan he hun hi hmanpuiin MzSRLM, Department of Rural Development leh Mizoram University buatsaih Baseline Survey Report chu a tlangzarh nghal a ni. Rural Development Minister chuan kum kalta April 22 a Mizoram Chief Minister Pu Lal Thanhawla hova MzSRLM bul tan a nih atang khan Block pali - Serchhip, East Lungdar, Bilkhawthlir leh Thingdawl ah te hma lak niin September thla atangin hna thawh tan nghal a ni a, kum khat ral hma in Self Help Group (SHG) tam tak an pun belh tawh a ni, a ti. Mizoram sorkarin SERP, Hyderabad leh OMPLIS of Orvakal Block, Andhra Pradesh nen thawhhona thuthlung an ziah chuan rah tha a chhuah a, thingtlang khua a mi harsa zawk hmeichhe tam takin SHG an zawm thar a ni, a ti a. An ni bakah hian Mizoram University te nen thawk hovin Mizoram chhunga SHG te zirchian hna an thawk a, MzSRLM hmanga miretheite dawmkan hna thawh chuan awmzia a nei tan chho mek a, an hnathawhte a taka hmuh tur a awm chu lawmawm a tih thu Pu R Lalzirliana hian a sawi a ni.

CRP te hian kum khatah an biala khaw hrang hrangte vawi li (4) an tlawh chhuak thin a, an tlawh kual hun chhung hian ni 45 zel a awh a ni. An bial theuhah insemdarhin SHG dinbelh dan leh a dinsa tihlen dan an zawng a, SHG awmsa te tichak leh zual turin zirtirna an pe thin a. Tun tumah hian Andhra Pradesh atangin SHG kaltlanga hlawhtling tawh hmeichhia pariat (8) leh Professional Resource Person (PRP) te an lokal a, block tinah pahnih zela insemdarhin khaw hrang hrang an fang a ni.

Rural Livelihood Mission hi sorkar laipui Rural Development Ministry in miretheite chawikan nan a duang chhuak a. He Scheme in a tum ber chu thingtlanga khawsa mirethei zawk ten anmahni puala eizawnna ngelnghet an neih theih nan Self Help Group behchhana chhawmdawlna pe in bul an tan pui a. Miretheite'n dingchhuak tura theihna an neih chu haichhuak a, hlawhtlinna kawng kawhhmuh leh an thiamna tihpun sak chu National Rural Livelihood Mission hian a tum a ni.

Tun tumah hian Andhra Pradesh, Assam, Manipur, Meghalaya, Nagaland, Tripura, Sikkim leh Ministry of Rural Development, New Delhi atangin he programme chhim tur hian mi pawimawh engemawzat an lokal a ni.