1189/2022-2023
Aizawl 8th July 2022: Aizawl khawpui Bawngkawn leh Vaivakawn flyover siam tura ruahmanna kal mekah tukin khan Rural Development Minister Pu Lalruatkima hovin sorkar official hrang hrang ten Vaivakawn Junction Flyover siam dan tur ruahmanna an enho.

Tukkina Vaivakawn Junction Flyover siam dantur enhona hi PWD tena (Feasibility report) an siam tawh atanga hmunhma lak tur leh tih chhiat tur ram enfiahna neih a ni a, RD Minister chuan hmasawnna ruhrel tha zawk nei turin ram thangzel mila kan hmasawnna ruhrel te pawh kan kalpui a tul chho dawn a ni a ti a.

Vaivakawn Junction Flyover tura ruahman chhin danah hian Zohnuai atanga Temple pan chhohna chu Bazar kawn atanga kal chho turin ruahmanna siam a ni a. Junction Flyover siam tur ah hian mimal ram leh In te lak a ngai nual dawn niin a lang a, he ruahmanna hi Mizoram sorkar in inremna a ziahpui Telecommunications Consultants India Ltd (TCIL) ten an bawhzui anga an ni hian Central ah sum mamawh tur dil in a hna an thawk nghal dawn a ni.

Tukina Vaivakawn Junction Flyover siam dantur Minister Pu Lalruatkima hoa en ho na ah hian AMC Councillor Pu Lalfakzuala chuan tawiawmin, Adviser to Chief Minister (Technical) Pu K Sawmvela, PWD Engineer in Chief Pu Bowmen, TCIL Consultants aiawh bakah khawtlang hruaitute pawh an tel a ni.