Vawiin chawhma khan Leikapui Banquet Hall, Hotel Floria-ah Rural Development (RD) Department Minister Pu Lalruatkima hovin Rural Development Department officer ten hnathawh thlirletna hun an hmang.

Rural Development Minister chuan thu sawiin RD Department chuan ram hmasawnna turin mawhphurhna kan nei lian hle a, mi zawng zawng huap department a ni, a ti a. RD Department-in ram pum huap pawha hnathawk tha lawmman an la thei chu an chhuanawm hle a ni tiin hotute, officer-te leh hnathawkte thawhrimna rah a ni, a ti a. Sawrkar programme SEDP hi thingtlang mipuiin lei rem an rah theihna tur leh eizawnna ngelnghet neih theihna tura hmalakna a ni, a ti. Kalkhawmte hnenah chuan SEDP hnuaiah thingtlang hmasawnna atan mawhphurhna sang zawk pek an nih pawhin theihtawp chhuaha thawk zel turin a chah a. Kan ram hmasawnna tura scheme leh project hrang hrang kalpuinaah hian theihtawp kan chhuah a ngai tak meuh a ni tiin kan kalpui dan endik chungchangah pawh fimkhur leh uluk lehzuala tan lak a ngai bawk a ni, a ti a. Scheme hrang hranga hamthatna dawngtu turte thlannaah pawh mamawh ngawih ngawih te ngai pawimawh thin turin a fuih a. Department hnathawh danah thing leh mau humhalh zawnga kan kalpui ngai a ni, tiin kan hnathawhte chu quality tha leh tlo zawk an nih a pawimawh hle a, hemi tehna hmang hian kan inel thin tur ni, a ti a. Department langtlang leh mipui tana malsawmna ni turin duhsakna a hlan a ni.

Rural Development Commissioner & Secretary Pu Lalhmingthanga chuan thu sawiin department project leh scheme hrang hrang sawi zauna leh hmalaknate a tarlang a. Chung zinga thenkhat chu-

1)PMAY (G) hi mirethei tana insak tanpuina niin kum 2016-2017 first installment-ah hian target 2401 a ni a, sanction zat hi 2401 niin 2033 sak zawh a ni. 

2)Mission Antodaya hi thingtlanga cheng ten hmasawnna tluangtling an neih theih nana ruahmanna a ni a, hemi hnuaiah hian khaw tinin an hmasawnna tur zawng chhuakin chumi hnuah department hrang hrang in an thawh hona hnuaia hmalak tur a ni a, October 2017 khan tan a ni.

3) Sansad Adarsh Gram Yojana (SAGY) hnuaiah hian MP ten model village-a vuah tur khua an thlang a. Phase I-ah Chhiahtlang leh Khawlailung thlan a ni a, Phase II –ah Haulawng leh Tlungvel thlan a ni a, hmalakna kalpui mek a ni.

4) Mizoram State Rural Livelihoods Mission (MzSRLM) hi April 2013 khan kalpui tan niin tun dinhmunah hian Self Help Group 4303 niin revolving fund atan cheng nuai 456 vel sem tawh a ni.

5)MGNREGA hi kum 2015 atang khan kalpui a ni a, tun dinhmunah hian nikhata hlawh zat hi cheng 194 a ni a, job card 192000 a ni.       

Rural Develpment scheme hrang hrang hmangin presentation neih chhunzawm a ni a. RD Additional Secretary Pi K. Lalrinzuali chuan lawmthu sawina in hun a khar a. Directorate leh district hrang hranga officer-te an tel kim hle a ni.