Vawiin khan Tourism Department buatsaih “Christmas Street Decoration 2018” a kawn cheia veng hrang hrang inelnaa a ti tha zual pathum te puanna hun Chaltlang Tourist Lodge ah neih a ni a, Pi Esther Lal Ruatkimi, IRS, Commissioner & Secretary, Tourism Department chu Khuallian niin Pu Biakthanmawia Pautu, Director in he hun hi a kaihruaia, kawn chei intihsiaknaa tel zawng zawngte hnenah lawmpuina thilpek hlanna hun neih a ni bawk.

Pi Esther Lal Ruatkimi, IRS, Commissioner & Secretary, Tourism Department chuan,”Kan ram economy chawi san theihna hmanraw pawimawh tak chu Tourism hi a ni” a ti a,” Christmas Street Decoration hmang hian mipuite tan tual chaina tur nuam tak kan buatsaih mai bakah khualzin mite hipna hmanraw tangkai takah kan hmang thei a ni,” a ti bawk. Pi Estheri chuan nasa zawka kawn chei hi kalpui a, Tourism a kan ram in hma a sawn theih nan a hmang tangkai turin kal khawmte a chah bawk.

Christmas Street Decoration 2018 hi NEDP kaltlanga Tourism department buatsaih a ni a, endiktute hi Central YMA, Mizoram Journalist Association leh Tourism Department aiawhte an ni. He inelnaah hian hmun 20 chei a ni a, Lawmman Pakhatna latu hi Ramhlun South Nuvalaite niin Cheng Nuai 4 leh Citation hlan an ni a, Chaltlang Branch YMA te Pahnihna niin Cheng Nuai 3 an dawng a Pathumna hi Mission Veng leh Tuikhuahtlang Branch YMA ten intawmin Cheng Nuai 1 ve ve hlan an ni bawk.