Thingtlang khuaa cheng, in neilo leh di ina khawsa te tana in thar sakna tur leh in chhe tawh thawmthatna tura sawrkar laipui hmalakna pawimawh tak Pradhan Mantri Awas Yojana - Gramin (PMAY-G) chu vawiin khan Assembly Annexe Conference Hall-ah Rural Development Minister Pu R Lalzirliana'n a hawng. He scheme hi Prime Minister Narendra Modi chuan kum kalta November 20 ah khan a lo hawng tawh a, State tin te hawng tura hriattir an nih angin Mizoramah pawh hawn a ni ta a. PMAY-G hawng thei hmasa state tlemte zingah Mizoram hi a tel a ni.

Pu R.Lalzirliana chuan PMAY-G hian in leh lo nei lo te, Kutcha in leh in siam that ngaite tan kum 2022 a pucca in leh in chhung mamawh zualpui sak sak chu a tum bulpui ber niin a thawhkhatnaah kutcha in leh in siamthat ngai vaibelchhe khat vel chu kum 2016-17 atanga 2018-19 chhunga sak tum a ni, a ti. Minister chuan a phu ngei ten tanpuina an dawn theih nan mipui kalkhawm Gram Sabha kaltlangin dik taka beneficiary thlan chhuah tum a ni a, diklo taka thiltih tum chu sawrkarin a do dawn tiin mi retheite chanai sum lokal mi awm thei zawkina lo awh chu thil thianglo a ni, a ti a. Sawrkarin scheme tam tak, a bik takin thingtlang a chengte tana hmasawnna leh hamthatna tur a duan te chu mipuite tawiawmna tha tel loin a hlawhtling theilo tih sawiin pen khat tala Mizoramin hma a sawn theihna turin mipuite tawiawmna RD Minister chuan a ngen a ni.

PMAY-G hi IAY tiha hriat thin, a thalo laite paiha, belh ngaite belh a nih hnuah a kal hmang siamtha in a hming thlak a ni a, in sakna sum pawh beneficiaries hnenah thawh li a pek chhuah a ni tawh dawn a. Beneficiary te hnenah IAY hunlaia cheng 75,000 pek thin kha PMAY-G ah chuan cheng nuai 1.3 pek an ni tawh ang. Beneficiary in a duh chuan bank nena inremsiamin cheng 70,000 thleng an puk belh thei bawk. A dawng thei thlan dan pawh tihdanglam niin IAY hunlaia BPL list atanga thlan thin kha PMAY-G ah erawh chuan Socio Economic and Caste Census (SECC) hmanga chhungkaw harsat dan tehfung hrang hrang a siam tlin te zingah, mipui pungkhawm Gram Sabha in an endik ngeite thlan an ni ang. PMAY-G hi Sawrkar laipuiin kum 2022 ral hma ngeia rampuma chenna in nei loten in tha tak an neih theih nana a hmalakna peng pawimawh tak a ni.

PMAY-G hawnna inkhawmah hian RD Parliamentary Secretary Lt.Col (Rtd.) ZS Zuala, Mizoram chhung hmun hrang hrang atanga lokal khawm beneficiaries te bakah RD hnuaia officer leh staff-te an tel a. Programme hi RD Secretary Pu Lalhmingthanga'n kaihruaiin Addl. Secretary Pi K.Lalrinzuali'n kalkhawmte lawmna thu a sawi a. Pu Paul L.Khuma, State Nodal Officer leh Under Secretary RD chuan PMAY-G nihphung a sawifiah a, RD Deputy Secretary Pu R Lalthazuala'n lawmthu sawiin hun hnung a khar a ni.