No.7761/2020-2021

Aizawl, the 11th March 2021 : Vawiin khan Rural Development Minister Pu Lalruatkima'n Government Middle School, Tuikual North kum 50 tlin Golden Jubilee lawmna programme buatsaih chu khuallian niin a hmanpui a. He programme ah hian Deputy Mayor, Aizawl Municipal Corporation Pu R. Thanglura chu  khualzahawm a ni. 

Rural Development Minister leh bialtu MLA ni bawk Pu Lalruatkima chuan Government Middle School Tuikual North in kum 50 an tlin chu a lawmpui thu sawiin he sikul chhuak ten Sawrkar, Kohhran leh khawtlang ah dinhmun pawimawh tak tak an luah mek leh mi hlawhtling tam tak an chhuak tawh hian he sikul dinhmun a hril chiangin zirtirtu hmasa te thawhrimna leh inpekna tichiang a hle a ni, a ti. Ram leh hnam humhalhna hmanraw pawimawh ber chu zirna anih dan te sawiin Minister chuan ram leh hnam humhalh khaikhawmna pawh zirnaah a tawp zel a, zirna hi hnam dam kawhchhuahna ani, a ti. 

Pu Lalruatkima chuan tunlai khawvel changkang chho mek hi thiamna leh hriatna khawvel a nih thu sawiin hriatna in chakna min pe a, thiamna in hnehna min pe thin a ni, a ti a. Thalai lehkhathiam ten theihtawp chhuah a an beih loh chuan entik ni ah maw chuan Sawrkar dihmun pawimawh ber berte hi loh theih lohin hnamdangin an thut chilh dawn niin a lang a, chuvangin zirna leh thiamna lamah kan thalai te kan intlansiak a pawimawh hle a, chutiang turin kan ngaituahna te, kan mi ngaihsan zawng te leh kan value system te kan thlak a pawimawh hle a ni, a ti a. 

Minister hian Jubilee hriatrengna atana article ziahkhawnna Souvenir bu a tlangzarh nghal bawk a ni. 

Deputy Mayor, AMC leh bialtu Councillor ni bawk Pu R. Thanglura pawhin he hunah hian thu sawiin zirna leh thiamna hmangin Mizo zirlai ten khawvel ram dang mite an umpha thei a ni, a ti.

Jubilee lawmna programme hi Pu H. Lalramzuava, Chairman, Jubilee Organizing Committee in kaihruaiin inlawmna thu chu Pu F. Kamhmunga Headmaster in a sawi a. School chanchin leh report dangte chu Pu P.C. Lalchhuankima hnen atangin ngaihthlak a ni. Jubilee puala Souvenir buatsaih chanchin chu Pu T. Rohmingliana'n a sawi a ni. Chawhma lam khan Jubilee lungphun hawnna pawh neih niin Jubilee dar vuak hun te pawh siam a ni. 

Government Middle School, Tuikual North hi kum 1970 a din niin he sikul hian mi hlawhtling tak tak thahnem tak an lo chherchhuak tawh a. Anni hi Sawrkar leh khawtlang tana mi tangkai leh dinhmun pawimawh tak tak chelh te an ni hlawm a ni.