Kum 2016-2017 chhunga Pradhan Mantri Krishi Sinchayee Yojana - Watershed Development Component (PMKSY-WDC) hmalakna thlirhona Review Meeting chu vawiin khan RD Conference Hall-ah Rural Development Minister Pu R.Lalzirliana leh Parliamentary Secretary Col.Z.S.Zuala (Rtd) hovin neih a ni.
PMKSY-WDC Review Meeting hawnna Rural Development Director Pu Lalhriatpuia kaihhruaiah Khuallian Pu R.Lalzirliana chuan Project dang ang lo takin PMKSY-WDC chu huamzau leh kawng hrang hranga mipui thleng pha project a ni a, he Project-in a tum ber chu rambua (watershed area) tangkai zawka hman theih tura siamthar a ni, a ti a. Mizoramah pawh eibar zawnna avang leh khawvel thang zelin environment leh ecological balance nasa takin a tichhe mek avangin ramchang tha hmuh tur awm tawh lek lovin ram suat a ni a, Mizote lo/huan neih dan lah hmana pipu te tih dan ang thovin la kalpui a ni reng a, hei hian nasa takin ram a tichhia a, rambua a siam a, lei leh tui luangral a nasain thlai tharte pawh a hlawk thei ta lo a ni, a ti bawk. PMKSY-WDC-in a tuam chinah tunlai thiamna leh Mizote ban phaka leilung ven dan te, tui renchem dan te, lo neih leh huan siam dan mumal zawka kalpui a ni a, chutiang hmunah te chuan tuilakna te siamin Horticulture leh Agriculture bakah ramngaw siamthatna lamah nasa takin hmalak mek a ni thei ta chu a lawmawm takzet a ni, a ti. Tui leh leilung luangral tur venna chi hrang hrang terrace te, contour te, checkdam te siam niin hengte hian an veng a, tuihna tam tak awm tawh lote pawh a siam thar bawk a. Heng bakah mipui chhumchhia zawkte dawmkanna turin eizawnna bul tansak a ni bawk a, hei hian eizawnna nghet a siam sak a, ram an tichhe leh zel tur pawh a veng hle a ni tiin Pu R.Lalzirliana chuan hetiang project tha leh department-a hnathawktute inpekna a taka hmuh tur a awm ta hi a vanneihthlak takzet a ni, a ti. Khuallian hian ‘PMKSY-WDC Batch-I Projects Consolidation Report Book’ a tlangzarh nghal bawk.
Rural Development Secretary Pu Lalhmingthanga pawhin thu sawiin PMKSY-WDC hi Integrated Watershed Management Programme (IWMP) tiin kum 2009-2010 khan 11th Plan chhungah Prime Minister Flagship Programme atan ramchhung state zawng zawngah (Goa tiam lovin) hmalak tan a ni a, tuna PMKSY-WDC tia a hming thlak ni ta he project hi kum 2027 thleng daih tura pawm a ni, a ti. State tinte chu State Level Nodal Agency din tura tih an nih angin Mizoram-ah pawh Chief Secretary Chairman-na hnuaiah State level Nodal Agency, Mizoram Watershed Development Agency (MzWDA) tia hming vuahin din niin State Perspective & Strategic Plan (SPSP) siam a ni a; MzWDA chu The Mizoram Societies Registration Act, 2005 hnuaiah register a ni tih a sawi bawk. Project kalpui dan hi Central-State sharing pattern hi 90:10 a ni a; tun dinhmunah hian project fund Centre Share atangin Rs.224,38,99,840 leh State Share atangin Rs.23,82,97,300 chiah dawn a ni tawh bakah Institutional Support Fund Rs.3,64,44,191 dawn a ni tih a sawi a. SPSP-ah hian project 170, project cost cheng nuai 94656.90 hmanga ram hectare 631046 tuam turin duan a ni a; project 89-ah hmalak ni tawhin chung zingah project 16 chu ni 31st March, 2017 khan zawhfel tawh a ni a. Project zawhfel tawhah hian cheng nuai 9365.25 sengin ram hectare 62435 tuam a ni tih a tarlang.
Vawiin Review Meeting-ah hian kumin April ni 20, 2017-a rampum huapa North East & Hill Station States zinga titha ber lawmman ‘Prime Minister Award for Excellence in Public Administration’ Siaha District-in a dawn chungchang Project Manager hnen atangin report ngaihthlak a ni a. Kum kalta 2016-2017 chhunga District tinte hmalakna atangin Mamit District hnenah ‘Best District Award’ chu Parliamentary Secretary Col.ZS..Zuala (Rtd)-in a hlan nghal bawk a ni.
Attachment
- Loading attachment...
