54/2024-2025 

4th April, 2024: 1-Mizoram (ST) Parliamentary Constituency for General Elections to Lok Sabha lo awm tur kaihhnawiha National leh State Recognised Party-ten thusawina hun an neih dan tur chu vawiin khan Addl. Chief Electoral Officer Dr H.Lianzela, IAS hovin ICT Conference Hall, Old Secreatariat building-I Top Floor-ah ruahmanna siam a ni a. Mizoramah Recognised National Party BJP, INC leh AAP awm mekin, Recognised State Party MNF, ZPM leh ZNP an awm a, AAP leh ZNP tih loh party dang zawng he hunah hian an tel a ni.

He hun kaihruaitu Addl. Chief Electoral Officer Dr. H.Lianzela chuan Election Commission of India-in inkaihhruaina a siam angin National leh State Recognised Party-te tan inthlan dawn hnaiah Sawrkar Media DDK leh Akashvani kaltlanga party thu leh hla, ECI inkaihhruainate zawm chunga chhuah tura ruahmanna siam thin a nih thu a sawi a, inthlanpui hmachhawn tura inpuahchahna atana political party-te zawm tur leh tih tur te a sawifiah nghal bawk a ni.

Electronic Media kaltlanga Political Advertisement pe turten Media Monitoring and Control Committee atanga pre-certification an neih hmasak zel a tul thu leh vote thlak zawhfel hun bituk darkar atanga chhiar leta darkar 48 chhung 'silent period' ah campaign kaihhnawih tihchhuah phal loh a nih thu a sawi a. Kalkhawmte chu vote tla a that theih nan mipuite zirtirna tam zawk pe turin a chah a. Vote thlak ni April ni 19, 2024 chu sawrkar hnathawkte bakah mimal sumdawng emaw, hnuaia thawk neite tan hlawh kiam chuang lova chawlh, ‘Paid Holiday’ ah Sawrkarin a puan thu tarlangin, hei hian mimalin hnathawka an chhawr/awmpuite pawh huam vekin vote thlak tura an haw laia hlawh pawh pek ngei ngei tur a ni tih a sawi bawk.

Recognised political party-te hun chan dan tur pawh (draw of lots) niin ruahmanna felfai tak siam a ni a. Recognised Political Party tin tan tum khatah minute 15 aia sei lo zela tih chhuah tura ruahman niin, chhuah zat tur erawh inthlan hmasa lama an chet that dan a zir zelin bituk a ni a. National party zingah BJP in minute 360 hun neiin vawi 24 thuchah sawina hun an nei dawn a, INC in minute 210 hun neiin vawi 14 thuchah sawina hun an nei ang. Recognised State party zingah MNF leh ZPM ten vawi khat ve ve minute 15 chhung thuchah sawina hun an nei thung a, anni party pahnih hi minute 10 dang hun dang atan pek belh an ni a, BJP leh INC hi munite 2 ve ve hun dang atan pek pelh an ni thung. National Party AAP leh Recognised State Party ZNP te chuan an tel dawn loh thu an sawi avangin thuchah sawina hun hi pek an ni lo thung.

Recognised political party-te chu Sawrkar laipuiin a ngaih pawimawh leh a thlawn liau liaua ruahmanna a siam chu ngai pawimawh tur leh a tihlawhtlingtu nih tum tura chah an ni a. DDK leh Akashvani kaltlanga an thu leh hla tih chhuah turah ram dang rorelna sawiselna, hnam, chibil leh sakhua anga inhuatna chawk chhuak thei thil te, hming hmerha mi dang beihna leh tawngkam mawi lo hman te, tharum thawhna lam hawi leh Court thutlukna kalh zawngte dah lo tur te, President, Judiciary leh ramhimna chungchang hmer tel lo turte leh ram inpumkhatna tichhe thei zawng tihlan a rem loh thu hrilh an ni.

An thu leh hla record turte chu tih chhuah a nih hmain uluk taka endik phawt a nih dawn thu hrilh an ni a. ECI in a pek chhuah digital time voucher keng zel tura chah an ni bawk.

Election Commission of India in ruahmanna an siam ang Akashvani leh DDK ten an programme neih apianga an chhawpchhuah tur coffe mug hlan an ni a, Dr. H. Lianzela, Addl. CEO-in DDK, Aizawl hnenah hlanin Pu Henry C. Lalrawnkima, Dy. CEO-in Akashvani, Aizawl hnenah a hlan thung a ni.

He hunah Deputy CEO Pu Henry C. Lalrawnkima leh Election Offical dangte, DDK leh Akashvani thawktute, Recognised National Party BJP leh INC bakah Recognised State Party MNF leh ZPM aiawhte an tel a ni.