HIV/AIDS darh zau zel venna turah lemchan intihsiakna Red Ribbon State Level Open Drama Competition 2011 chu vawiin khan Health & Family Welfare Minister Pu Lalrinliana Sailo chuan I&PR Auditorium-ah khuallian niin hawnna programme a hmanpui. He Drama Competition hi MSACS leh Art & Culture Department tangkawpte hian an buatsaih a ni.

Pu Lalrinliana Sailo chuan HIV/AIDS chu natna do harsa tak ni mahse, mipuite tanrualna leh tawhhona a that chuan a darh zel ven leh do hneh theih anih thu a sawi a. Sorkar leh hemi kawnga hma latu NGO te hnathawh that avangin thisen endik tir nachang hriatna lamah mipuite an thangharh zela tiin he natna dona kawngah hmalakna pawimawh tak anih thu a sawi. Health Minister hian National AIDS Control Organisation (NACO) in Hmarchhak state-te huapa Multimedia Campaign neihna ah MSACS hmalakna chu state dangte entawn tura phochhuah hial a nih thu a sawi bawk.

MSACS Project Director Dr. Eric Zomawia chuan HIV/AIDS darh zel tur venna atana Multi Media Campaign, a bikin football leh zai lamah intihsiakna an buatsaih thin chu NACO hotute chuan tha an tih thu leh MSACS in Multimedia Campaign an kalpui dan chu NACO chuan 2010 International AIDS Conference Vienna-ah phochhuah hial a ni tih a sawi.

Lemchan intihsiakna ah hian pawl 139 in hming an pe lut a, November ni 21 atangin Vanapa Hall-ah tan tura ruahman niin vawiin khan a tel tur ten an tih ni tur an pawt nghal a ni. Intihsiakna First Round chu November ni 21 atanga ni 26 thleng buatsaih a ni anga, Top 20 inelna chu December ni 1 leh ni 2 zanah nei tura duan niin Top 5 Final Round chu December ni 5 a buatsaih a ni ang.