Vawiin chawhnu dar 1 khan Transport Minister Pu P.C. Zoram Sanglianan a office chamber-ah tualchhung chanchinbumite kawmna a nei. A hmasain Minister chuan tualchhung chanchinbumite nen thawhhona tha tak an neih thin avanga lawmthu sawina a nei.

He Press Conference ah hian Minister chuan Mizoram sorkar ina motor chhiah a lak dan chungchang sawifiahna a nei. Chu chhiah lak chu central sorkar guidelines zulzuia Mizoam Taxation & Road Transport Act 2011 anga lak anih thu a sawi a ni. Hemi chungchangah a tul anga ennawna siamtha leh turin sorkar chuan Study Group/Team pawh a din mek thu a sawi. Siamthat anih hma chuan sorkar chuan tuna a tih dan pangngaia kal rih zel a tum a ni a ti. Sorkar in thil tha ber a ngaihtuah mek laia Mizoram Motor Vehicles Taxation Refinement Demand Co-ordination Committee (MMVTRDCC) ten bandh huaihawt an tum nia a hriat thu-ah tha lo a tih thu a sawi bawk. Ministry of Highway & Road Transport in Mizoram Transport Department ah craine motor 4 a pek thu a sawi bawk.

Minister chuan Transport department ah hnathawk tha lo/dik lo an awm chuan thuneitute hriattir a, a tul anga action lak anih tur thu a sawi bawk.

He Press Conference ah hian tualchhung chanchinbumite leh media lam thawkte an kal tha hle a ni.