869/2023-2024

Aizawl the 21st June 2023 : Vawiin khan Remna Ni 2023 lo thleng tur lawmna chi khat atan District tinah High School zirlaite pualin Quiz competition neih a ni a, thupuiah “Political History of Mizoram: 1947 (post independence) to 1987 (statehood i.e 20th February 1987) tih hman a ni.

School Education Department-in Remna Ni puala a buatsaih Quiz competition hi District khawpui tinah DEO/DPC, Samagra Shiksha te kaihhruaiin neih a ni. Quiz competition hi District level leh state level a inelna tur a ni a. Vawiina District tina pakhatna theuhte hi Aizawl-ah kalkhawmin June 27, 2023-ah State Level-a intihsiakna an nei leh dawn a ni.

Vawiina District Level Quiz competition-ah hian lawmman pakhatna Rs 30,000, pahnihna Rs 20,000, pathumna Rs 10,000 bakah certificate pek an ni ang a, state levelah pawh hetiang zat bawk pawisa fai leh certificate te pakhatna atanga pathumna lawmman dawngtute hnenah pek an ni ang.

Vawiina District level Quiz competition-ah hian District hrang hranga tel zat belhkhawm chu High school 157 an ni a, heng school atang hian team 174 an tel thei a, team khatah hian naupang pahnih zel an awm a, zirlai 348 an tel a, School thenkhat atang chuan team khat aia tam te pawh an tel a ni.

Nimin khan Remna Ni pual hian District Level Essay competition neih a lo ni tawh a ni. State Level quiz competition  lawmman chu June 30,2023 Remna Ni lawmnaah sem a ni ang.