Vawiin khan UD &PA leh ITP Senergy Advisory Services Pvt. Ltd. tangkawp buatsaihin Education leh Health Sector a nizung chakna hman dan tur zirna Tourist Lodge-ah neih a ni a. UD &PA Minister Pu Zodintluanga’n Workshop hi a hawng a ni.
Minister chuan hawnna thu sawiin Mizorama power mamawhna sang chho zelah a phuhrukna tur ngaihtuahin sorkar chuan Renewable Energy Technology lamah hma a lak thu a tarlang a. Aizawl Solar City a siam tumna Scheme pawh Ministry of New and Renewable Energy (MNRE)-in a thuphunga 28.10.2009 khan a lo pawm tawh thu leh Stakeholder Committee leh Solar City Cell te pawh din a nih tawh thu tarlangin Aizawl Solar City Master Plan, International Council for Local Environmental Initiatives (ICLEI) buatsaih pawh March 2011 khan MNRE ah thehluh a ni tawh a ni, Minister chuan a ti. Hetihlai hian nizungchakna hmanga power siam chhuah tangkaina mipuiin an hriat theih nan Aizawl Municipal Council Office-ah Solar Water Heating System, Solar Home Lighting System, Solar Lantern leh LED Solar Street Light te dah a ni a, UD &PA Department-in nizungchakna hman hmasakna tur thlanmual, community hall, local council house, street light leh New Market Building atang te in DPR siamna tur data pawimawh te an lakhawm fel tawh a ni, a ti bawk. He project hi hlawhtling taka peihfel a nih a, hman theih a nih hunah chuan manto taka kawlphetha kan lei thin kha tlawm takin mipui mimirin kan hmang thei tawh dawna, chuvangin he Project hi a hlawhtlin thuai theihna turin tan kan lak tlan a tul takzet a ni, Minister chuan a ti.
He huna thusawi tu dang Mizoram State Planning Board, Member Secretary Pu PL Thanga pawhin Mizote chu technology thar ngaihven vat mi kan nih thu sawiin Renewable Energy Technology thar hman chungchangah pawh mithiam te kaihhruaiin tangkai taka mipui ten an hman a beisei thu a sawi a. Vawiin Workshop-ah pawh mithiam te zirtirna atanga ngaihtuahna thar sengin kalkhawm ten Mizoram mipuite tangkaipui tur thil thar an hriatchhuah a beisei thu a tarlang a ni.
Workshop hi nilenga neih niin Zoram Energy Development Agency (ZEDA) Director Pu David Zahmuaka, ITP Senergy hnuaia Renewable Energy Solutions Head Pu Dwipen Boruah leh mithiam thenkhat ten zirtirna an pe a. Aizawl Municipal Council, School Education leh Higher & Technical Education, mimal leh sorkar Hospital bakah mimal leh sorkar sikul aiawh mi engemawzatin Workshop hi an chhim a ni.
