Ram chhung hmun dangte rualin Republic Day 2012 chu Mizoram pumah pawh hman a ni a, a lawmna pui ber Ramhlun Sports Complex-a neih ah tukin zing dar  9:00 khan Mizoram Governor Pu Vakkom Purushothaman chuan Hnam puanzar a pawt pharh a, Parade contingent hrang hrang chibai a chhanglet a ni. He hunah hian Chief Minister Pu Lal Thanhawla leh a nupui Pi Lal Riliani; Speaker Pu R. Romawia; Council of Ministers; Parliamentary Secretaries leh MLA engemawzat an tel a ni.

Lammual pawn lama Hnam Ni pawimawh hman vawikhatna leh Mizoram Governor Pu Vakkom Purushothaman in Republic Day a hnam puanzar ah pawh pharh hmasak berah minute 15 chhung thuchah a sawi ah chuan kum kalta chhunga Mizoram Sorkarin hmasawnna hrang hrang a neih te a tlangpui a tarlang  a ni.

Mizoram Governor chuan a thuchah ah chuan ram zalenna sualtute leh ram hruaitu hmasa te kan hre reng a; mahni inphat a, an inpekna hlu tak azarah ram ropui tak leh Danpui hmathlir zau leh huapzo kan lo nei thei a ni, a ti a. Larsap chuan ram Danpuiin a kenkawh tlat, mipui rorelna ram kan nihna ziarang hlutna leh thatna te hi vawnghim a, tichak a, chhawm nung zela intiam thar leh turin mipui te a chah a ni.

Larsap chuan Ram hmasawnna atan muanna boruak kan mamawh a ni tiin, hemi kawngah hian Mizoram chuan hneh taka dan leh thupek kengkawhtute kan neih bakah NGO te, kohhran leh an hnuaia pawl hrang hrang te, thuthar thehdarh tute leh mipui ten ram ralmuang ber kan nih zel theihna tura dan leh thupek kengkawngtu te an tawiawm reng hi a vanneihthlak thu a sawi.

Governor chuan ei leh bara ram dinhmun siam thatna tur leh mirethei te chawikanna tura duan, NLUP chuan nghawng a neih tan mek thu sawiin Governor chuan he ruahmanna tha tak leh a thil tum ti hlawhtling tur hian NLUP dawngtu zawng zawngte chu anmahni eizawnna thlan theuh vah rinawmna leh tumruhna nen, taima taka thawk turin a ngen a. NLUP hnuaiah hian eizawnna peng hrang hrang atan chhungkaw 45,139 thlan chhuah an nih thu a sawi.

Larsap chuan ei leh bara ram hmasawnna hnukpui chu lo neih leh a zawmpui hna peng hrang hrang hmasawnna nen a in thlun zawm tlat a ni, a ti a. Loneitute leh hnathawktu te hmasawnna tel lovin Mizoram hi ram nuamsa a nih tak tak thei ngai dawn loh avangin Mizoram sorkar chuan kawng hrang hrangin loneitute hamthatna a ngaihtuah sak thu a sawi a. Kum 2010-2011 chhung khan tlangram lo neihna hmun hi za zela 36% vel in a tlak hniam thusawiin Larsap chuan 11 Five Year Plan tir lama  44,947 hectare  atangin hemi kum chhung hian 28,735 hectare ah a tla hniam hman a ni, a ti a. Hetianga tlangram lo neihna hmun a zim sawt na chhan hi Watershed Development Programme for Shifting Cultivation Areas (WDPSCA), Oil Palm Development Programme leh Sugarcane Cultivation Programme te kalpui anih vang a ni a ti bawk. Larsap chuan thar chhuah a pun deuh deuh theih nan kut hnathawktu te chu kawng hrang hranga chhawmdawl leh tanpui an ni tiin thlai chin dan leh enkawl dan tha zawk te kawh hmuh an niin training leh enchhinna te neihpui an nih bakah thlai chi tha leh thlai tiak te ngaihtuah sak an nih thu te a sawi bawk.

Ram dinhmun chawikang turin thil siam chhuahna, Industries lamah hma lak a tul thu sawiin Larsap chuan hmun hrang hrang ah Industries tih hmasawnna tur hmunhma buatsaih a niin Zuangtui-ah Industrial Estate, Lengte ah Export Promotion Industrial Park te din a ni a ti a. India ram mau zawng zawng hi semrualin za zela 14% zet thawhtu state kan nih angin industry a hma kan lakna tur pawimawh tak pakhat chu mau sawngbawlna lam hi a ni a ti.

Governor chuan Industry hmasawn nan leh mihring nunphung chawikan nan Power & Electricity mamawh a nih thu sawiin Mizoram Sorkar in hemi kawngah hmun hrang hranga hmalakna a neihte a tarlang a. Hmasawnna atan inkal pawhna kawng tha kan mamawh a ni tiin India sorkar Look East Policy hnuaiah Myanmar leh Mizoram  tuipui kawng a thlun zawmna tur, Kaladan Multi Modal Transit Transport Project chu kum 2014 hian peih hman tura ruahman a nih thu a sawi. Mihring thiamna tih pun leh hman tlaka chherna tur kawng dap chu hian sorkar-in a ngaih pawimawh thusawiin Champhai, Kolasib, Lawngtlai, Mamit, Saiha leh Serchhip ah te Polytechnic Institutes din tum a ni a ti. Thingtlang khua zawng zawng ah leh khawpui ah tui thianghlim hnianghnara pe thei tura sorkar-in hmalakna hrang hrang a kalpui mekte a tarlang bawk a ni .

Basic Services to Urban Poor (BSUP) scheme hnuaiah Chite, Lawipu, Rangvamual leh Durtlang ah te mirethei zual leh chenna in neilo te tan housing project 4 hmangin mirethei in tur sak mek a nih thu Governor chuan sawiin hei hian khawpui a cheng mirethei chhungkaw 1,096 te a khung leng thei dawn a ni a ti. 13th Finance Commission hnuaia grants for Urban Local Bodies chu Aizawl khawpui chhung enkawlna hna hrang hrang, bawlhlawh sawngbawlna, tui supply, thlanmual enkawl, tuihawk luankawr siam nan leh in sak khuahkhirhna dan kenkawh hna thawh nan te Aizawl Municipal Council kutah hlan a ni tawh thu tarlang a.  Aizawl Municipal Council chu mawhphurhna tam zawk nen mahnia ro rel theia thuam chak chhoh mek a nih thu sawi bawk a ni.

Governor chuan Autonomous District Council 3 te pawhin nasa takin hma an sawn thu sawiin  Mizoram sorkar-in heng Autonomous District Council area te mamawh  leh a bika an harsatna te a hria a, a ngaihven a ni a ti.

Larsap chuan NGO zawng zawng te, Kohhran, thalai leh mipui ten ram hmasawnna atan leh muanna boruak vawnghim tura an thawh avangin lawmthu  sawi a. Mizo hnam nuna bet rinawmna, aia upa zahna leh tlawmngaihna nen hnam nunze mawi chhawm nung a, Mizo nihna humhalh tlat chungin India ram hmun zau zawka chengte nen zai khatah lungrual taka kan luan za thei nghet taka a rin thu a sawi bawk  a ni.

Vawiin a Republic Day lawmnaah hian Parade Contigent 24 - Silai keng 4, silai kenglo 6  leh school 12 bakah Band Party 4 in lam an entir a ni. Parade a titha leh Republic Day puala infiammna thenkhata inelna siam a titha te hnenah Governor hian lawmman a hlan nghal a ni.