India Republic Day vawi 63-na vawiin khan Kolasib ah ropui taka lawm a ni. Zing dar 10 khan Kolasib Tumpui field-ah DC Pi Niharika Rai, IAS chuan hnam puanzar pawtpharhin March past chibai a chhanglet a. Thuchah sawiin, he ni ropui tak hi kan ram mahni inrelbawla a puala Danpui kan hman tanna ni a nih avangin a hlu hle a ni, a ti.

Pi Rai chuan sawrkarin a tum lian ber chu mi rethei leh harsa te dawmkan hi a ni, a ti a. Deptt. hrangte hnathawh thenkhat tarlangin UD&PA hnuaiah IHSDP kaltlangin Kolasib khawpui chhunga chhungkaw 211 te chenna In sak zawh tep a ni a. Khaw chhung kawng siam hna pawh June 2012 ral hmaa thawh zawh tum a ni, a ti. Sangha khawitu mi 68 hnenah Dil thar siamna tur leh a nei tawh sa mi 136 hnenah chei thatna tur tanpuina pek a nih thu leh sangha chi a thlawna nuai 118 pek chhuah a nih thu a sawi.

Pi Rai chuan Kolasib hmuna SIRD Directorate awm hi mipui ten kan chhawr hle a ni, tiin he tah hian a din tirh kum 2011atangin training chi hrang hrang a bikin Rural Development lam hawi vawi 405 pe tawhin mi 18335 in training an dawng tawh a ni, a ti a. Sorkarin kumin buh thar tam kuma a puan chu a takin kan hlawkpui a. 2010 a buh thar aiin nikuma buh thar kha 1010 MT.laiin a pung a ni, a ti.Horticulture lamah pawh kan District chuan hma sawnin DRDA atangin SGSY hnuaiah BPL chhungkua te eizawnna tur ngaihtuahpui a ni a. IAY atangin retheite in sak sak a nih bakah MGNREGS inhlawhna chu kumin atana ni 100 inhlawh zawh tep tawh a nih thu pawh a sawi a ni. Forest lamah pawh sawrkarin Revenue a lakluh tipung turin Bairabi Rel station atangin mimal Teak 158 Wagon thawn chhuah tawh a ni, a ti. P&E Deptt. chuan RGGVY hnuaiah Electric Connection la nei lo khaw 6-ah eng pek hna a thawk mek a. BPL chhungkua 1897 hnena free connection pek torah 1264 te hnenah pek fel a ni tawh a ni, a ti a. Total Sanitation Campaign hnuaiah chhungkaw 7451 tan PHED chuan inthiarna Ek In a siam sak tawh a, vantlang tan 21ah, school tan 242 leh Anganwadi tan 71 an siam tawh bawk a ni, DC chuan a ti. Heng bakah hian Department dangte hmalakna pawh DC chuan sawiin Department te hnathawh chu lawmawm a tih thu pawh a tarlang a ni.

Republic Day lawmnaah hian Contingent 14 in parade hmuhnawm tak an entir a. Department lian panga—DRDA, Forest, Minor Irrigation, PHE, leh UD&PA ten mipui tana an hnathawhte pho langin tableau an entir a, Mizo Cultural Organisation ten Lam hmuhnawm tak an entir bawk.

Republic Day pual hian Painting competition H/S naupang tan buatsaih a ni bawk a, Home hrang hrangah thilpek hlan a niin Sports chi hnih Basket ball leh Cricket-ah te inelna neih a ni a. Khuallianin lawman tehi a sem a ni.