3493/2023-2024

Champhai the 26th January, 2024: India ramin mahni puala duan ram danpui a neih champhaphak hriatrengna leh lawmna India Republic Day vawi 75-na, naktuk January ni 26, 2024 a Chhangphut Field, Champhaia neih tur inpuahchahna kalpui chu vawiin khan hmawrbawk fel niin, Champhai chu Republic Day lawm turin a inpeih tawh a ni.

Parade contingent leh Republic Day lawmna puala inpuahchahna hnunhnung final rehearsal chu vawiin chawhma dar 10 khan Chhangphut Field-ah neih zawh fel niin, a lawmna tur hmun Chhangphut Field hmunhma cheibawl leh buatsaih pawh zawh fel a ni bawk a, mawhphurhna nei tura ruat hrang hrangte pawh an inpeih hlawm tawk bawk.

Naktuk January ni 26, 2024 Zirtawpni chawhma dar 10 hian Chhangphut Field-ah Champhai District Bawrhsap Pu James Lalrinchhana hovin Republic Day lawm a ni dawn a. Zing dar 6 ah sawrkar pisa, zirna leh mimal in ah te hnam puanzar pawtpharhin Republic Day lawmna ropui taka neih tum a ni a.

Republic Day lawmna hun hi a hmuna kal remchang lo te tana thlir theih turin Local Cable TV ah te thlir theih tura ruahmanna siam a ni bawk.

Chhangphut Field-a hun hman zawh hnu hian Jericho Garden, Keifangtlang-ah sawm bikte pualin VIP's At Home neih a ni dawn a. Republic Day lawmna puala buatsaih CDFA 2nd Division Football Tournament Final chu chawhnu dar 2 ah Kahrawt FC leh SM FC Khuangleng Team te'n an khel ang.

Kumin Republic Day lawmnaah hian Parade contingent 18; Armed contingent 2, Unarmed Contingent 7 leh School Contingent 12 te an awm dawn a. District Level Republic Day Celebration Committee chuan ropui taka Republic Day lawm anih theih nan mahni chanvo theuh hneh taka hlen turin mawhphurhna latu zawng zawngte a ngen a, Republic Day chu India ram ni pawimawh bik anih avangin sawrkar hnathawk, zirlai leh khawtlang mipuite chu he hun hi ngai pawimawha tel vek turin a sawm a ni.