Pi leh Pu, Nu leh Pa, Sawrkara ka thawhpuite leh thian duhtakte u,
Kumin Republic Day vawi 77-naah hian Khawzawl District mipui zawng zawng te chibai ka buk vek a che u; he ni ropui tak kan thleng leh thei hi lawmawm ka ti takzet a, hlim tak leh lawm taka hmang theuh turin duhsakna ka hlan a che u.
January ni 26, 1950 khan kan ram hi mipui rorelna ram, intluktlanna leh zalenna ram, mi tinin dikna chanvo kan neih theihna ramah kan hruaitu ten an lo siam tawh a, India ram chu ram ropui leh zahawm tak, khawvel puma ram pawimawh tak leh thil ti thei tak a lo ni ta a, ram hruaitute leh mipui thawh rimna zarah hriselna kawngah te, zirnaah te, eizawnnaah te leh thil dang tam takah India ram pumpui hian hma a sawn a ni.
Khawzawl District pawh kum 2019 a din a nih atang khan hma kan sawn chak em em a. Hand Holding Policy, Bana Kaih Policy kan tih, kan Sawrkar flagship programme hi kan rama kut hnathawktute tihhmasawnna tura ruahmanna a ni a. Department hrang hrang - Agriculture and Farmers Welfare Department te, Horticulture Department te, Rural Development Department te, Irrigation and Water Resources Department te, Sericulture Department te, Fisheries Department leh KVK hnuaiah te kut hnathawktute tihhmasawnna turin kan District chhungah Scheme hrang hrang hnuaiah nasa taka hmalak a ni a. Kut hnathawktute hriatna leh thiamna belhchhah turin training hrang hrang pek an niin thlai chi leh thlai tiak, chi hrang hrang kut hnathawktute hnenah sem a ni a, chhungkaw tamtak hnenah tanpuina pek a ni. Kut hnathawktute hna thawhna hmunhma tichangtlunga tihmasawn turin kawng hrang hranga hma lak a ni bawk.
Dan leh thupek kenkawh kawnga Police hmalakna hi a chhuanawm takzet a. Kan District chhung a ralmuangin a muanawm a, buaina liantham sawi tur a awm lo. Krismas leh kumthar vuakveta halpuah leh halmawi hal lo tura Sawrkar thupek tha taka kenkawh a nih avangin Police, Magistrate duty leh NGO hrang hrangte chungah lawmthu ka sawi takmeuh a ni.
Hmasawnna ruhrel lian tham din kawngah pawh kan District chhunga chak taka hmalak a ni hi lawmthu ka sawi takmeuh a ni. Public Works Department-in hmun hrang hrangah kawngpui sial leh thawmthat hna chak takin an kalpui a. Cheng vaibelchhe sawm man Circuit House sak mek a ni a, Revenue Quarters sak mek a niin District Research Office tihchangtlun hna pawh thawh mek a ni.
Khawzawl District-in hma a sawn zel theihnan ruahmanna chak taka kalpui a ni a. District Transport Office leh DC Office ah Revenue Branch hawn fel a ni tawh a. Treasury Office leh Quarters cheng vaibelchhe 3 man te, Sialhawk Multipurpose Hall cheng vaibelchhe hnih man te, Demdum to Tuichang Pump House cheng vaibelchhe 3 man te hna tan thuai theih beisei a ni a, Cheng vaibelchhe 15 man tur Mini Secretariat Complex ruahmanna pawh chak taka kalpui a ni. Deputy Commissioner of State Tax leh Assistant Commissioner, Excise & Narcotics kan nei thar bawk a, hei hi thil chhinchhiah tlak leh lawmawm tak a ni.
Hriselna kawnga hma kan sawn theihnan nasa taka hmalak a ni a. Khum 50 awmtheihna tur District Hospital leh Quarters sak hna pawh chak taka kalpui a ni a, Chief Medical Officer kan nei tawh a, Respiratory Medicine leh Paediatricts Doctor kan nei tawh bawk. Nikum September ni 19 khan Multi Speciality Clinic buatsaih a ni a, Doctor thiam tak tak tak te lo kalin mi 5640 an inentir a, hei hi thil lawmawm leh chhinchhiah tlak tak a ni.
Tui thianghlim, hnianghnar taka mi tinin kan dawn theihnan PHE Department in theihtawp an chhuah a. Thingtlang in 4910 ah functional tap water connection pek an ni tawh a, Hmuncheng Solar Pumping Scheme pawh hawn thuai theih beisei a ni. Tualpui Water Supply Scheme pawh chak taka bawhzui a ni bawk.
Kawlphetha hnianghnara kan dawn theihnan P&E Department in nasa takin hna an thawk a. Tualpui Power Supply pekna leh Kawlkulh khaw chhunga Power Supply pek chhuahna cheithat leh tihchangtlun hna pawh thawh zawh a ni tawh bawk.
Rural Development Department hnuaiah thingtlang mite hmasawnna leh intodelhna turin Scheme hrang hrang hnuaiah theihtawpa hmalak a ni a. Chawngtlaia Community Weaving Centre pawh hawn fel a ni tawh bawk.
Kan District chhunga khualzin kan hip theih nan kawng hrang hrangin hma lak a ni a. Nikum September ni 16 khan kan Chief Minister zahawm tak hoin Tualpuiah Lozawhpui ropui taka hman a ni a. Kawng hrang hranga hmalakna hian khualzinte a hip mai bakah kut hnathawktute tan beiseina leh tumruhna, taimakna thar a siam ngei ka beisei tlat a ni.
Ruihhlo do hna hautak zet mai pawh hi nasa taka kalpui zel a ni a. Kum kalta chhung khan kan Police Department ten Heroin gram 747, cheng nuai 84.80 man leh Meth kg 11.612, cheng nuai 150.96 man hu an man a. Excise & Narcotics Department ten Heroin gram 539 leh Ganza gram 880 an man bawk. Ruihhlo do kawngah hian Kohhran, NGO leh tlawmngai pawl hrang hrangte nasa lehzuala kan tanho a ngai takmeuh a ni.
Kan District chhunga hmasawnna kal mek te hi kan sawi vek seng awm love. Department hrang hrangte thawhrimna leh inpekna fakawmin chhuanawm ka ti takmeuh a, kan mipuite tan nasa lehzuala tan la turin ka sawm takmeuh che u a ni.
Vawiin Repuublic Day lawmna atana rim taka thawktu zawng zawng te, Parade Contingent te, Band Party te, Parade Commander te, Announcer te, zirlai naupang leh mipui lo kalkhawm zawng zawng chungah te ka thinlung takin lawmthu ka sawi takmeuh a ni.
Thian duhtakte u, Kan ram Danpuiin zalenna leh intluktlanna min pek hi vawng himin inhmangaih tawna, inlungruala, indawmkang tawnin, hawh u, kan ram hi ram nuam leh changkangah i siam ang u.
KA LAWM E
JAI HIND
