Vawiin khan India Republic Day vawi 66 na chu Mangkhawngdai Playground, Mamit-ah ropui taka hman a ni. Khuallian Pu K.Lalthawmmawia, Deputy Commissioner Mamit chuan zing dar 11:00 a.m ah hnam puanzar pawtpharhin, parade contingent te hnam puanzar chibai buk a chhanglet a ni.

Khuallian chuan kalkhawm te Republic Day vawi 66 na chibai bukin, boruak muanawm leh ram ralmuang kan nih theih na tura venhim hna thawktu sipai te leh police te zahna chibai a buk a.India mahni inrelbawl theia siamtu leh nun hlantu te, Dan pui tha tak min petu te zahna chibai a buk bawk. Khuallian chuan Mamit districtin hmasawn lam kawng a zawh zel chu lawmawm a tih thu sawiin, kan district chhunga sorkar hmalakna leh hmachhawp te a zavaia tarlan sen a nih loh avangin thenkhatte chauh ka tarlang dawn a ni, a ti a. Sorkar Flagship Programme NLUP zar zo nasa berte zinga mi kan ni a, tun thleng hian chhungkaw 11310 in Mamit district a Line department 8 awm hnuaiah trade hrang hrang ah tanpuina an dawng tawh a ni, a ti. Line Department te hian an hna an thawk tha hlawm hle a ni a ti bawk. Oil Palm chin leh rah tharchhuahah Mamit District chu Mizoram pumah hmahruaitu a ni mek a, nikum 2014 April-June chhung ringawt pawh khan Oil Palm rah (FFB) 2,271quintls thar chhuah a ni. Tunlai thiamna hmanga hlawk zawka buh thar theihna turin ram 1200 hectare ah hma lak mek a ni, a ti.

Electoral Roll thar ber pawh 15th January, 2015 khan tarchhuah niin, Mamit district-ah vote nei mi 59991 kan awm mek a ni. Tripura Relief Camp-a Bru awmte hruaikir thawh rukna 17-20 June, 2014 chhung khan neih a ni a, he mi tum hian chhungkaw 170 lo lutin Mamit district chhunga khaw hrang hrang 24 ah chenna siamsak an ni a. Heng bakah hian mahni a rawn let chhungkua 101 an awm bawk, a ti.

Zirna lamah chuan RMSA kalpui a nih hnu in Mamit district chhungah school 12 sak zingah 3 chu sak zawh tawh niin luah tawh a ni. Thawktu hmeichhia te tan bik chenna tur quarter 18 sak zawh tawh niin, 3 sak mek a ni. SSA Mission hnuaiah naupang school lut lote zirna huang chhung pangngaia sengluh an nih theihna turin Special Training Programme 2 leh Non-Residential Special Training Centre 5 hawn a ni bawk. Zirlai ten zirlaibu leh uniform a thlawn in an dawn bakah, chaw chhun hi school 107 a zirlai 16504 in an dawng mek bawk. Khanthuamah Primary School hawn thar a ni dawn bawk, a ti.

Local Administration Department chuan Thirteenth Finance Commission atanga sum hmuh Rs. 1,76,87,500/- hmangin khaw thlam bik 26 te tan Solar Street Light 5 theuh ZEDA kaltlangin a pe a. UD&PA Dept. hma lakna in khawpui chhunga cheng in sakna nei lote tana IHSDP (JNNRUM) hnuaia Mamit a chhungkaw 150 in sakna tur project chu zawh fel tawh niin, luah luh tawh a ni. DRDA hnuaia MGNREGS hnuaiah kum 2014-2015 chhung hian Job card nei chhungkaw 20300 
awmin, ni za an inhlawh tlin ngei theihnan hma lak a ni a. tun thleng hian chhungkaw 20156 te ni 9 inhlawhtir an ni tawh a. Thingtlang mi rethei chenna in nei lo leh sa thei lo tur, BPL chhungkua te tan IAY hnuaiah kumin chhungin in 49 sak a ni tawh a, a dang 49 sa leh thuai tura hmalak mek a ni. IWMP hnuaiah hian khaw hrang hrang 17 tuamin Project 6 kalpui mek a ni.

Khuallian chuan Mamit District chhunga khua zawng zawng eng pek tura hmalak a ni a, RGGVY hnuaiah khua 73 tuam niin tun thleng hian khaw 60 chu zawh fel a ni tawh a. Heng khaw 73 bakah hian khaw 11 dangte chu chu Deendayal Upadhyaya Gram Jyoti Yojana (DDUGJY) hnuaiah eng pek tura ruahmanna siam a ni. Mamit khawpui in power supplyah khawpui dang kan phak lohna ti ziaawm turin Bairabi lam atangin power lakluh tuma hmalak mek niin DPR pawh NEC ah thehluh fel tawh a ni, a ti. 

PHE Dept chuan tui hnianghnara kan awm theih nan nasa taka la in, tunah hian khaw hrang hrang 17ah tui lak hna thawh mek a ni a. Nirmal Bharat Abhiyan hnuaiah Sanitary Complex, Public Bath leh Toilet te sak a ni bawk. 

PWD lam pawn inkalpawhna kawng tha kan neih theihna turin hna a thawk mek zel a, Mamit-Phaizau kawng laih tum niin, W.Phaileng-Marpara kawng chei that a ni a, W.Phaileng- Damparengpui chu cement concrete hmanga siam mek a ni bawk. Lengpui - Hmunpui kawng pawh siam mek niin, December 2015 ah chuan zawh hman tum a ni. National Highway 44A siam hna pawh kalpui mek zel a ni, a ti bawk.

FCS&CA hnuaiah Mamit District-ah End to End Computerization of ration Card chu tih zawh tawh niin, headquarter lamah thawn fel tawh a ni. Mamit leh Kawrthahah Godown sak zawh tawh niin, Kawrtethawvengah Godown leh Quarters sak tura kalpui mek a ni. Tin, Mamit, Rengdil, Phuldungsei leh Zawlnuamah Godown sak turin buaipui mek a ni.

Ramngaw humhalh kawngah Mamit Forest Division chuan hma la zelin, ram 915 hectare lai a zau chu thing leh mau hmun atan a siam thar a ni. Heng bakah hian Fisheries Dept, Horticulture Dept., AH&VEterinary Dept.,Sericulture Dept., leh Soil & Water Conservation Dept., te pawn NLUP bakah hma nasa takin an la a ni. Fisheries Dept., chuan Fish Farmer Development Agency (CSS) hnuai atangin Sangha Dil thar siamna atan chhungkaw 46 hnenah tanpuina sum fai Rs.22.5 lacs pek an ni a, chhungkaw 188 hnenah tanpuina sum fai Rs.17.66 lacs pek an ni bawk a. Fisherman Welfare Scheme hnuaiah mi 100 hnenah thlam sak tanpuina Rs. 50,000 theuh pek a ni bawk. Soil & Water Conservation Dept. hnuaiah River Valley Project (RVP), IWMP leh RKVY hnuaiah lei chunglang hang tha riral tih tlem na’n terrace 70 hectare siam niin, tuikhuah 25 siam a ni bawk.

Police Deptt. leh 4th IR Battallion lam pawn district himna leh muanna atan theihtawp an chhuah a, Excise and Narcotics Dept lam pawhin ruihlo leh zu laka district a fihlim nan theihtawp chhuahin, MLPC Act, kalpui a nih theihnan hma an la mek zel a ni, tiin. Khuallian chuan heng sawrkar hmalakna hrang hrangah hian mipuite chu sorkar tawiawm tura sawmin, ram Danpui zah tur leh vawnghim tlat turin a chah a ni.

Vawiin Republic Day lawmnaah hian parade contingent 9 awmin, Armed Contingent 1- 4th IR Battallion leh school contingent 8 te an ni. School contingent ti tha lawmman dawngtute chu: 1- St Fransis of Assisi School (Boys), 2- New Diamond English Medium School leh 3- JNV School te an ni. Parade Commander hi SI Dyan Singh Minhas a ni. Sipai Huaisen chawimawina( Shauria Chakra) 2014 a dawngtu Sepoy Lallawmzuala,18 Rashtrya Rifles, Tuahzawl Mamit District hnenah Chawimawina thuziak leh Pawisa fai Rs 5,000/- hlan a ni bawk.

Republic Day lawmna inkhawmah hian District a sorkar official te an kal tha hle. DC Bangla-ah sawm bik te tan thingpui inhona neih a ni a, Mamit Hospital a damlo leh Shelter Home a naupangte tlawh a ni bawk.