3980/2024-2025

Dated Hnahthial, the 26th January, 2025 : India ramin zalenna a sual chhuah hnu a ama puala Danpui (Constitution) a neih champha lawmna - Republic Day, vawi 76-na chu Hnahthial District-ah neih a ni a. Hnahthial District chhunga lawmna pui ber chu Hnahthial District Football Association (HDFA) Turf ground-ah neih niin District Bawrhsap, Pi Rita Lalnunmawii Pachuau chuan hnam puanzar pawt pharhin  parade contingent pakua (9) te chibai bukna chu a chhang let a ni.

Bawrhsap chuan India ram tana hun pawimawh tak mai chhim tura rawn kal zawng zawngte leh Hnahthial District mipuite chu chibai a buk a. He niah hi kan ram democracy a siam a, ram Danpui (constitution) duangchhuaktu, kan hruaitu hmasate inpekna chu kan hre reng a ni tiin an hna thawh chhunzawmtu, khua leh tui tha tak ni theuh turin Hnahthial District mipuite chu a sawm a. District mipuite chu ram leh hnam hmangaihna rilru pu tha leh tur a sawmin sawrkarin hmasawn nana hma a lakna te thlawp tlat zel turin a sawm nghal bawk a ni.

Pawimawh a tih em em mai chu tun hnaia kan ramin harsatna a tawh mek lian tak mai, ruihhlo vanga harsatna hi a ni a ti a. Hnahthial District phei chu a tuartu lian berte zing ami a nih thu sawiin ruihhlo tawlhna kalkawng lian tak kan ni hi veiawm a tih thu a sawi a. He thil do let nan hian Sawrkar, NGO leh Kohhran ten theihtawp an chhuah thu sawiin ruihhlo do nan District Task Force pawh din a nih thu a sawi a. Kan tu leh fate tan a ram tha, chenna tlaka siam turin Hnahthial District mipui zawng zawngte chu heng hmalakna te hi thlawp tlat turin a ngen bawk a ni.

Hnahthial District-in kum 2024 chhunga hmasawnna leh hlawhtlinna a neih langsar zualte, Bawrhsap chuan a tar lang a.

1. Hnahthial District-ah Sawrkar Department pahnih - Taxation Department leh Excise & Narcotics Department te hawn thar niin District Civil Supply Officer (DCSO) post leh Executive Engineering (EE), PWD  post te neih thar a ni bawk.

2. Solid Waste Management Centre, Rotlang East ah buatsaih mek a ni.

3. Hmeichhia, hleilenna tuarte buaipui turin One Stop Centre ni 16.08.2024 ah hawn a ni.

4. District Hospital, khum 50 awmna tur chak taka sak mek a ni.

5. Govt. Pawngzawl H/S ah Science Stream hawn thar a ni a, PM SHRI School atana India ram pum school 14,000 thlan chhuah zingah Govt. Primary School-I, Hnahthial thlan tel a ni. PM SHRI Activity peng pakhat, quiz inelnaah Govt. P/S-1 te chuan Mizoram pumah pakhatna dinhmun an hauh. 

Govt. Southern H/S, Hnahthial te'n Mizoram Pipe Band Competition-ah Pakhatna an hauh a, Eastern Zone Pipe Band Competition-ah Mizoram aiawh in an kal bawk.

6. District Vety Hospital-cum-Laboratory sak hna chak taka kalpui mek a ni.

7. Circuit House sak hna chak taka kalpui pui mek a ni.

Bawrhsap chuan tun February ni 12 a Village Council inthlanpui kan hmachhawn turah hian Hnahthial mipuite chu Democracy chawi nun nan vote thlak theuh turin a sawm nghal a. Republic Day hlawhtlin nana kalkhawm zawng zawngte hnenah lawmthu a sawi bawk a ni.

Republic Day lawmnaah hian Parade Contingent pakua (9) awmin Parade commander, 2nd Commander, Govt. Hnahthial College NCC leh Govt. Southern High School pipe band-te hnenah special prize hlan niin parade contingent ti tha pathum(3) te hnenah lawmman sem a ni a. Lawmman dawngtute chu:

1st Prize : Govt. Southern H/S Girls

2nd Prize : Govt. High School 

3rd Prize : Govt. Model Middle School 

Contingent tel zawng zawngte hnenah consolation prize hlan vek an ni.

Nikum krismas leh Kumthar vuatveta sawrkarin halpuah leh halmawi a khapna thupek zawm tha YMA branch pathum (3) te hnenah lawmman hlan niin pahnih(2) consolation prize pek an ni bawk a. Fireworks Prevention lawmman dawngtute chu:

1st Prize: YMA Kanaan Branch 

2nd Prize: YMA Model Branch

3rd Prize: YMA Lungleng Branch

Consolation Prize: YMA Chanmari Branch leh YMA Electric North Branch

Lui nungchate leh sangha thlahpun hun chhunga man khapna, Closed Season a humhalh kawnga YMA branch tihtha pathum te hnenah lawmman sem niin pakhat hnenah consolation prize pek a ni bawk a. Chungte chu:

1st Prize: YMA Bazar Branch 

2nd Prize: YMA Venglai Branch

3rd Prize: YMA Electric Branch

Consolation Prize: YMA Chanmari Branch

Child Welfare tana thawk tha YMA branch pathum te hnenah lawmman semna neih nghal bawk a ni a. Lawmman dawngtute chu: 

1st Prize: YMA Kanaan Branch 

2nd Prize: YMA Peniel Branch

3rd Prize: YMA Chanmari Branch 

Lawmman semna neih zawh hian Republic Day lawmna hun hi khar a ni.

Bawrhsap thusawi kimchang chu link ah hian chhiar theih in dah a ni : https://dipr.mizoram.gov.in/post/speech-of-pi-rita-lalnunmawii-pachuau-deputy-comissioner-hnahthial-district-on-the-occassion-of-76th-republic-day-2025