Vawiin a helai hmuna Republic day hmang tura lo pungkhawm zawng zawngte leh Hnahthial District mipuite in zavaiin chibai u le. Vawiin niah India ram in mahni a ro inrel thei tura India danpui tha tak, mitin huap zo leh Democracy chawinung tlat mai constitution duang chhuaktu kan hruaitu hmasate inpekna hlutzia hi hre thar leh ila. An hnathawh chhunzawmtu ni a khua leh tui tha ni theuh turin tan i la thar leh ang u.
He ni pawimawh takah hian Hnahthial District mipuite hi ram leh hnam hmangaihna rilru pu thar leh turin ka ngen duh che u a. Sawrkarin kan District mai bakah Mizoram pum huap hmasawnna rahbi thar kan neih theih nan theihtawpin kawng hrang hrangah hma a la mek a. He Sawrkar hmalaknaah hian neitu nihna rilru pu chunga thlawp tlat turin ka sawmin ka ngen bawk che u a ni.
Vawiin hun remchang laa ka sawi lan duh pawimawh ka tih em em mai chu kan ramin tunhnaia harsatna a tawh lian em em mai Ruihhlo vanga harsatna kan tawh hi a ni a. Tunhma lam aiin kan District pawhin kan tuar nasa chho niin a lang. Ramri depa awm kan nih avangin kan thenawm atangin Ruihhlo tawlh kalkawng kan ni chho tan mek ni pawha sawite a awm chho tan ta a. Ruihhlo do kawngah hian Sawrkar leh NGO te, Kohhrante tangkawpin theihtawpin hma kan la chho mek a. Kan District chhungah pawh Task Force te dinin theihtawpin tan kan la mek a ni. He kan hmalaknaah hian mipuite hi thahnemngai taka min thlawp turin ka sawm duh che u a. Kan tu leh fate tana ram tha chenna tlak kan siam theih nan kan vawiin hun hi a pawimawh a ni tih hria a, tha thlah lo turin ka sawm che u a ni. Tin, NGO leh Kohhran lamte pawh in hah in tha pawh in thawh nasa tih kan hria a, kan lawm em em a. Amaherawhchu, hei aia nasa zawka la tang thei kan ni tih hriain tan i la sauh sauh ang u.
Vawiin Republic Day ni pawimawh takah hian Hnahthial District in kum 2024 chhunga hmasawnna leh hlawhtlinna tamtak a hmuh zinga a langsar zual tlemte tarlan a tha in ka hria a.
1. Hnahthial District ah Sawrkar Department pahnih Taxation Department leh Excise & Narcotics Department te hawn thar a ni a. Tin, DCSO post leh EE (PWD) post te neih thar a ni bawk.
2. Solid Waste Management Centre, Rotlang East ah buatsaih mek a ni.
3. Hmeichhia hleilenna tuarte buaipui turin One Stop Centre ni 16.08.2024 ah hawn a ni.
4. District Hospital khum 50 awmna tur chak taka sak mek a ni.
5. Govt. Pawngzawl H/S ah Science Stream hawn thar a ni a. PM SHRI School atana India rampum school 14000 thlan chhuah zingah Govt. Primary School-I Hnahthial thlan tel a ni. PM SHRI Activity peng pakhat, QUIZ ah Govt. P/S-I te hi Mizoram pumah pakhatna dinhmun an hauh.
Govt. Southern H/S, Hnahthial te'n Mizoram Pipe Band Competition-ah Pakhatna an hauh a, Eastern Zone Pipe Band Competition-ah Mizoram aiawh in an kal.
6. District Vety Hospital-cum-Laboratory sak hna chak taka kal pui mek a ni.
7. Circuit House sak hna chak taka kal pui mek a ni.
Heng bakah hian hmasawnna kawng hrang hrang tun huna sawi vek sen loh tamtak kan hmu a. Hei hian Sawrkar, NGO te leh Mipuite kan tan hona a ti chiang hle a. Thawhhona tha tak nei zel thei turin ka sawm nghal bawk che u ani.
Kan hriat angin 12.2.2025 hian VC Inthlanpui kan hmachhawn dawn a. Hemi ni hian Hnahthial mipui ten Democracy chawi nunga vote thlak theuh tur pawhin kan in ngen bawk e.
A tawp berah chuan vawiin Republic day hlawhtling taka kan hman theihna tura mipui lo kal khawm zawng zawngte leh Parade Contingent zawng zawngte, in za vaia chunga tih tak meuhin lawmthu ka sawi e.
Ka lawm e. JAI HIND.
