4366/2025-2026

Dated Aizawl, the 10th February, 2026 : Nimin khan Reserve Bank of India (RBI), Aizawl Office chuan kum tina an hman thin Financial Literacy Week (FL Week) hawnna hun chu Multipurpose Hall, Govt. Multiutility Centre, Thakthingah an hmang. FL Week 2026 hi Pu T. Lhungdim, General Manager & Officer-in-Charge, RBI Aizawl chuan a hawng a ni.

Pu T. Lhungdim chuan thusawiin, RBI chuan kum 2016 atang khan mipui hnenah sum leh pai enkawl dan inzirtirna thupui bik neiin Financial Literacy Week (FLW) hi kum tin a kalpui thin tih a sawi a. Kumin thupui atan “KYC - Himna atana rahbi hmasa/ KYC-Your first step to safe banking” tih hman a nih thu leh he thupui hmang hian him taka bank thiltihna atan ‘Know Your Customer’ (KYC) a pawimawhzia a sawi a ni.

FL Week 2026 hi Feb 9 -13 chhunga hman tur niin, hemi pual hian RBI Aizawl Office chuan nimin khan Financial Literacy Van a vai liam a. He Van hian Mizoram district pathum—Saitual, Khawzawl leh Champhai-te tlawh kualin, mipuite an awmna hmun ngeiah FL Week thupui leh sum leh pai enkawl dan chungchang zirtirna an pe dawn a ni. Hemi bakah hian, GM (O-i-C), RBI Aizawl chuan kumin thupui “KYC-Your first step to safe banking” chungchangah All India Radio, Aizawl kaltlangin thuchah a sawi bawk a. Aizawl khawpui chhungah pawh City Bus thlan chhuah bikah FL Week thuchah hi pamphlet hmangin passenger-te hnenah sem a ni bawk dawn a ni.

He hawnna inkhawmah hian Pu Lalrokunga Chhakchhuak, DGM, NABARD, Mizoram RO, Pu Samrat M Jha, Assistant Director, MSME DFO, Shri Lalphanglo Tusing, SLBC Convenor, Pi Sheryl L Vanchhawng, Chairperson, Mizoram Rural Bank leh Pu Lallungmuana, CEO, Mizoram Co-operative Apex Bank-te pawhin thu an sawi a. RBI-in sum leh pai enkawlna chungchanga hmasawnna tura hma a lakna chu tha an tih thu leh Mizoram state pumah he inzirtirna hi uar zawka kalpui zel an tum thu an sawi a ni.