Vawiin hian Lai Autonomous District Council General Election 2015 Returning Officer, District Election Officer ni bawk Pu J. Hmingthanmawia chuan a Pisa ah Chanchinbumite kawmin inthlanna hlawhtling taka neih a nih theih nan hmalakna hrang hrangte a hrilhfiah.

Pu J. Hmingthanmawia chuan, Polling Station 103 zinga Polling Station 4, Sabualtlang leh Kakichhuah; Tuithumhnar Bial a mite leh Zochachhuah leh Hmawngbuchhuah; Sekulh Bial a mi te chu Sensitive Polling Station a dah an nih thu a sawi a. Sensitive Polling Station a dah an nih chhan chu Indo-Myanmar Border-a awm an nih vang leh hel pawlten an paltlang thin vang a ni. Amaherawh chu inthlan laiin vawi khat mah heng hel pawlte hian harsatna min la siam ngai lo, a ti.

Polling Station Voters 700 leh a aia tam nei khaw 38 ah Presiding Officer pakhat leh Polling Officer pathum zel tirh an ni dawn a, a bak Polling Station ah te chuan Presiding Officer pakhat leh Polling Officer pahnih theuh dah an ni ang. Heng Polling Officials turte hian training chi hrang hrang an nei mek a, dt 18 atanga vawiin thlengin vote an thlak lawk theihna tur ruahmanna siam a ni tawh bawk.

Communication Plan chungchangah chuan Polling Station 42 te hi Mobile Phone Signal thatna hmun an ni a, a bak Polling Station 61 ah te erawh hi chuan MPRO te an duty thung ang. Sector Officer (Magistrate) 7 ruat an ni tawh bawk a, an ni hian an bial chhunga Model Code of Conduct bawhchhiate thlithlai leh Vote thlak ni a Electronic Voting Machine Reserve te an enkawl dawn ani. Vote thlakna khawl (EVM) pawh hi ni 17.11.2015 atang khan enfiahna neih tan tawh a ni a, vawiin atang hian Commissioning tan a ni. EVM enfiah tur hian a siamtu Company atangin Engineer pahnihten an thutchilh mek a ni. State Election Commission chuan he inthlan Observer atan hian mi pahnih Chhimtuipui chhak lam zawng bialtu atan Pu R. Thanga leh khawthlang lam zawng atan Pu Lalthlamuana, Secretary, Government of Mizoram ve ve te a ruat a, Lawngtlaiah an awm ve ve tawh a ni.

Lawngtlai SP Pu Sanglura pawhin venhimna lama hmalakna te a sawi bawk a, Sensitive Polling Station bikah Armed leh Unarmed sipaite duty tir an ni ang a, a bak Polling Station ah te chuan Unarmed vek duty tir an ni ang. Engemaw harsatna thleng thut awm palh hmachhawn thuai thei turin Striking Force paruk buatsaih an ni bawk a, hmun thlan bikah an inbun dawn a ni. Venhimna hna thawktu mi 435 zet ruahman an ni a, an hmalak dan tur tlangpui inhrilhhriatna ni 23 leh 25 khian an nei dawn a ni.

LADC General Election 2015 hi tun thla ni 26 ah Vote thlak a ni anga, ni 28 ah Lawngtlai DC Conference Hall ah leh BNRGSK Hall ah te chhiar zui nghal tur a ni ang.

Returning Officer Pu J. Hmingthamawia’n chanchinbumite a kawmnaah hian Lawngtlai SP Pu Sanglura bakah, District Information Officer Pu K. Saitluanga ten an tawiawm a ni.