Land Revenue & Settlement Department in leiman/ Chhiah a khawn chungchangah mipuite hriat tur pawimawh inhrilhriatna vawiin khan Kolasib DC Conference Hall-ah Pu H.Lalengmawia, District Bawrhsap hovin neih a ni.

He hunah hian Pu H.Lalengmawia chuan mipuiten chhiah kan pek tur te kan hriatchian loh avanga chhiah pek kan harsat thin thu sawiin, chhiah kan pekdan tur leh a chhan hriat chuan lungawi takin kan pe thin a ni a ti a. Land Revenue & Settlement Department hnuaia leiman chhiah kan pek te inhrilhriatna atan inkohkhawm anih thu a sawi. Land Revenue & Settlement Office, Kolasib kaldan ah rawtna leh lungawilohna nei tan Assistant Settlement Office-ah engtiklai pawn thlen theih reng a nih thu a sawi. Bawrhsap chuan Site Allotment Advisory Board, Kolasib din a nih tawh a, in hmun dil tur hria te chuan Board hnenah a dil theih thu a tarlang tel a ni.

Vawiin hunah an sawi pawimawh zual te chu : Land Revenue & Settlement Department-in chhiah khawn nan Mizoram Land Revenue Act leh Mizoram Land Revenue Rules behchhan a ni a. Ram neitu in chhiah kumtin pek hi a mawhphurhna a ni a, a pek loh kum atangin kumtin 20% in a pung zel a ni. Chhiah pe lo chu an ram neitu nihna cancel sak theih a ni a. Chhiah khawn dawnah Tlangau hmangin hriattirna tihchhuah a ni thin a, chhiah petu ten receipt lak zel tur niin, receipt pe duhlo ngei ani tih finfiah chhiah khawntu chu a chhiah khawn zat let thum aia tam chawitir theih a ni. Chhiah pelote thin hnu pawha ngaihsak lo leh pelo chu an inhmun lilam sak theih a ni. Leiman Chhiah lak hrang hrang te :

· Zoram chhiah (mizo leilung fate tan) -Rs. 50/- (chhungtin atangin)

· House Pass, Stall /Shop Tax, House Site LSC, Periodic Patta, Agricultural LSC - grade hrang hranga thenin, rate hran theuh a nei a ni.

· Building Tax (AT/RCC) - RCC Rs.170/-, AT Rs.100/-, SP – Rs.120/-

· Surcharge - Annual Rent 10% paih hnuah 90% atanga 2%

· House Tax - Rs.30/- (Village bikah)

Vawiin inhrilhriatna hunah hian DIPRO, Joint VC, Sub-Hqrs MUP leh MHIP, Kolasib, MJA Kolasib, Kolasib Development Committee te leh Revenue Department lam an tel a. Leiman chungchanga zawhna leh hriatfiah duh neite zawhna Pu Lalnunfela Chawngthu, ASO in chhangin, sawihona huntha tak neih a ni.

Attachment

  • Loading attachment...