No.4342/2021-2022
Aizawl, the 21st March, 2022:  Compensatory Afforestation ram pek chungchang ah vawiin ni 21.03.2022 khan Revenue Minister Pu Lalruatkima chuan a kaihhnawih department - Law & Judicial, Environment, Forest & Climate Change  te leh Land Revenue & Settlement  official te meeting a neih pui.

Minister chuan Mizoram chhung ah Central Sorkar-in development hna hrang hrang atan ram a mamawh thin a; State Sorkara department hrang hrang pawhin hmasawnna hna thawh nan ram an mamawh thin a ni, a ti a. A bik takin National Highway te leh BRTF road atan kawng thar laih leh kawng tih zauh nan Notified Reserved Forest ram tihchhiat a ngai thin a. Ram tihchhiat aiah ram reserved leh tur Compensatory Afforestation (CA) atan EF&CC Deptt-ah ram pek a ngaih thin thu a Pu Lalruatkima chuan sawi.

Tun dinhmunah, a bik takin Dungtlang to Vaphai to Farkawn BRTF road siam tak atan EF&CC Deptt in Notified Reserved Forest siamlohnaah C.A ram an dil chu uluk taka ngaihtuahho a tul thu Pu Lalruatkima chuan a sawi a. Hetianga Notified Forest awmlohna atan EF&CC Deptt hnena C.A ram pek a nih chuan precedence thalo tak siam palh a hlauhawm thu te; Sorkar tan hmasawnna hna kalpui kawngah harsatna a siam nasat theih thute sawiho a ni. He mi bakah hian LR&S Deptt-in ram ruak pek tur a neih tamloh thute, thingtlang V.C thenkhatin an area chhunga C.A ram tur Sorkarin a pek dawna dodalna an neih chhoh tak thute meeting-ah hian sawilan a ni a. He kawng atana CA pek tur atan hian Degraded Forest ram zawn thuai ni se tih a ni.

National Highway No.302 kawngpui laihzau leh thawmthat nana Tuichawng leh Tlabung Zodin vela mi chengte building leh huan ram acquire turah thenkhatin compensation an hmuh tawh laiin thenkhatin an la la ve thei lo a, an compensation dawn tur hi CALA leh NHIDCL te bank account-ah a awm tawh a, he account-a interest awm te hi Mizoram sorkar-ah lut lo in, NHIDCL te kutah zawk a luh thin thu meeting-ah hian sawi a ni a. Compensation la pekchhuah loh te ram hi EF&CC in forest area a ni an tih avangin pekchhuah an la ni lo mai chauh a ni. EF&CC Deptt-in C.A ram an dil leh objection an siam avanga compensation ramneitute’n an dawn theih loh thu te leh an manganna te  chu uluk takin sawi ho nghal a ni a. Ram neitute dinhmun ngaihtuah chungin Forest deptt te objection chungchang chu CALA in dan anga hma lo la tura tih a ni.