2396/2026-2027

Aizawl, 28th September, 2026 : Vawiin khan Land Revenue & Settlement Minister Pu B. Lalchhanzova'n Chekbawka ram neitute hnenah land pass a hlan, land pass hi a tahtawla (phase-wise) a hlan tura ruahman niin vawiin hian Phase-I hnuaiah mi 319 hnenah an land pass sem chhuah a ni a. Aizawl South-II bialtu MLA Pu Lalchhuanthanga, AMC Ward-19 Corporator Dr. Lalmalsawma Nghaka te pawhin he hun hi an hmanpui a ni.

Land pass hlanna inkhawm Chekbawk hmuna buatsaihah khuallian Pu B. Lalchhanzova chuan Chekbawk ramah hian inhmun plot 1217 tihfel a ni tawh tih sawiin, la tihfel lohte pawh chak taka bawhzui zel a ni tih a sawi a. 2025 November ni 11 khan Maumual ram chinfel a nih thu a hmunah kalin kan puang a, vawiinah Chekbawk ram a hmunah kalchilhin pass fel tawhte freezing order hlipa kan semchhuak ta hi a lawmawm a, politics-a inbeihzui nan erawh hmang lo hram ila ka duh a ni a ti a. Kan hma a sawrkarna siamtuten hma an lo lak tawhah an hun laia an tihfel hman loh chinfel kha kan tihtur ve reng a ni a, chumi tur chuan mipuite pawhin min beisei a, chhunzawm ngaite chhunzawm a, siamthat ngaite siam that kha kan tihtur ve reng a nih avangin kan hna kan thawk a ni mai a, thangthat lak tum leh insawisel zawnga hma lak vak vak loh hi a tha a, mipuite pawhin an duhdan a ni a ti a. Tunkar chhung hian Ramhlun Sports Complex leh Zemabawk High School Veng ram fel lo, buaina awm reng thinna pawh chinfel a nih thu puan chhuah tum a nih thu a tarlang bawk.

Minister chuan tuna land pass kan pawm tawh, a fel tawh kan tih 1217 zingah hian la umzui ngai, ennawn ngai hlekte pawh a la awm maithei a. Hetiangah hian Revenue Department-a thawktute rawn dawr thin ula, tha takin inpawh tlang takin tihfel ngai leh chinfel la ngaite kan chingfelho dawn nia a ti a. Chekbawkah hian veng nuam leh inlungrual, veng hnuam tak siam tura inthurual a pawimawh thu a sawi a, chutiang tur chuan duhsakna a hlan bawk a ni.

Pu V. Lalrindika, Asst. Director of Survey (G) technical report pek danin tunhma chuan Chekbawk ram hi Aizawla veng lian panga – Salem, Venghnuai, Dam Veng, Thakthing leh Kulikawn Joint Village Council hnuaia awm thin a ni a, World Bank road a tlang hnu hian Kulikawn Local Council hnuaiah a awm chhunzawm a ni. Kum 1997 khan Chekbawk ramah hian house site plan siam niin plot 305 a awm a, hemi house site plan siamna hmun chuan hnuaiah hian kum 2002 ah extension plan siam niin harsatna eng engemaw avangin kum 2009 khan revise a, plot size inkhuangrual lo lutukte pawh siam that a ni. Harsatna chinfel ngai a tam avangin sawrkarin an dinhmun zirchiangin Chekbawk ram pumpui re-survey tawp mai a rel a, kum 1997, 2002 leh 2009 plan zawng zawngte bakah a ram bang la awmte nen a pumpuia resurvey neiha plan that tur a ti a. He thutlukna ang hian October ni 5, 2021 atanga September ni 30, 2022 inkar khan en that a, plan that leh vek a ni a, hun hmasa lama plot lo awm tawhte pawh a theih ang anga remthat nghal niin internal roads te pawh laih a ni a, ruahmanna mumal tak siam nghal a ni bawk a, mimal ram tura plot vek lovin mipui vantlang hman tangkai tur (public place) green area, thlanmual, bazar, sikul etc., hmun tur pawh ruahman tel vek a ni ta bawk a ni.
2021-2022 revisionah hian square metre 10,76,508.841 (107.651 hectares) survey a ni a, plot 1369 (private-1352 leh public-17) siam a ni. Kawng (internal roads) kilometres 13.90 laih a ni a, a zau zawng hi 3.5 metres a ni. Resurvey neiha Plot an rem that hnu kum 2023-2024 ah revised plot angin LSC thar pek a ni a, hemi chungchangah lungawilohna neite leh sawiselna a awm avangin LSC pek chhuah mek pawh chhunzawm ni ta lovin, sawrkarin a zirchiang turin ruahmanna a siam leh a, fact-finding committee te dinin lungawilohna nei zawng zawngte thu leh hla a ngaihthlaksak a, a hmuna endik ngaite pawh endik that leh turin rawtna a siam a, revenue department official ten a hmunah an endik hnuin sawrkarah report a thehlut a, an endik hnua pass tihfel theih tawh plot 1217 chu freezing order hlipin pass issue theih tura peih a ni ta a ni. Pass pekchhuah hi Phase-wise a kalpui tur a ni ang.

Vawiin inkhawm hi LR&S Director Pu R. Lalthazuala'n khuhhawnna neiin,  Pu V. Lalrindika, Asst. Director of Survey (G) hnen atang technical report ngaihthlak a ni. Aizawl South-II bialtu MLA Pu Lalchhuanthanga leh Kulikawn Local Council Chairman  Pu Lalrinmawia Zadeng ten tgu an sawi bawk a, Pu Lalsanglura Asst. Commissioner (Revenue) Aizawl South in lawmthu sawina hun  hmangin hun a khar a ni.