2449/2026-2027

Dated Aizawl, the 30 September 2026: Vawiin khan Land Revenue & Settlement Department changtu Minister Pu B. Lalchhanzova chuan Zemabawk West Local Council House-ah, Zemabawk Middle School Veng House-site Plan huam chhunga ram neitu mi 96-te hnenah Ram lehkha/Record of Rights [ROR] a hlan a. Minister hi Pu Lalthansanga, Bialtu MLA leh Cabinet Minister ni bawk chuan a ṭawiawm a ni.

He hunah hian LR&S Department changtu Minister Pu B. Lalchhanzova chuan thusawiin, Zemabawk Middle School Veng House-site plan felfai taka peih a ni ta chu lawmawm a tih thu a sawi a. Chulai hmun chu tun hma lamin Risk Mual tih hiala lo hriat tawh ṭhin mah nise, Veng chhung mipui leh khawtlang hruaitute bakah, Sawrkara thawktute inpekna leh helai ramin a kaihhnawih zawng zawngte ṭanrualna vanga tihfelfai theih a ni ta chu chhuanawm tak a ni tih a sawi. Ram neitu ten thlamuang taka mahni ram an luah theih tawh turte, mahni hmun leh hma ṭheuhte a neitu nihna dik tak an chelh thei tawh turte chu ram neitute tan pawha hriat reng tawh tur a ni tih sawiin, mipuite harsatna chin felpui te, an lungngaihna te lo ngaihthlaksak leh an rawng bawlsak chu Sawrkar ngaihpawimawh ber a ni a ti a. Kalkhawmte chu mahni hmunhma leh in leh lote chu theihtawp chhuaha enkawl zel tura fuihin, ṭhenawm ṭha tak nih tum zel tur leh khawtlang nuam siam kawngahte theitawp chhuah turin a chah bawk a ni.

He huna thusawitu dang Bialtu MLA leh Cabinet Minister ni bawk Pu Lalthansanga pawhin kalkhawmte chu a lawmpui tak zet thu sawiin, Sawrkar chuan mipuite buaina ching fel tur chuan theitawp a chhuah zel dawn tih a sawi a. An harsatna apiang chu ngampa taka thlen zel tura chahin, a theih chin chinah Bialtu a nihna ang pawha theihtawp chhuahpui zel a tum tih a sawi bawk a ni.

Vawiina Ram Lehkha inhlannaah hian Ram neitute bakah LR&S Department hotute, Local Council hruaitute leh bialtu Corporator-te bakah thuthar lakhawmtute an tel a. Inhlanna hun hi Pu Vanlalmawia, Secretary, LR&S Department chuan kaihruaiin, Pu R. Lalṭhazuala, Director LR&S Department chuan Ram Lehkha chin fel nana hmalakdan tlangpui a sawifiah a. Hemi zawh hian Local Council, bialtu Corporator leh LSC Demand Committee te chuan thu sawiin, Ram Lehkha inhlannain a chhunzawm a. Pu Ngurthansanga, Asst. Commissioner (Revenue) Aizawl North chuan lawmthu sawiin hun hi a khar a ni.