1851/2024-2025

Aizawl the 31st August, 2024 : Nimin August ni 30, 2024 (Zirtawpni) zan khan Saron Veng Branch MZP ten an Veng chhunga Class X leh a chunglam zirlai hlawhtling (pass) tharte chawimawina hun an hmang a, Land Revenue Minister Pu B. Lalchhanzova’n khuallian niin a hmanpui.

Zirlaite chawimawina inkhawmah Khuallian Minister Pu B. Lalchhanzova chuan zirlaite chu an hlim ni leh lungngaih niah te, thil hrang hrang an hmachhawn niah nun kaihruaitu atan mi hmingṭha leh entawn tlakte entawn bik nei turin a chah a. Mihring taksaa harsatna tam tak thlen ṭhintu zuk leh hmuamah inthiarfihlim a, mahni taksa tan a ṭha ber chauh thlang ṭhin turin a chah.

Saron Veng YMA Indoor Stadium Conference Hall-a zirlai pass tharte chawimawina hun hi Tv. Lalremruata Ralte, Vice President, Saron Veng MZP-in a kaihruai a, zirlai ṭhahnem tak kalkhawmin Veng chhung NGO hrang hrang - YMA, MHIP, MUP, MCO hruaitute leh Local Council member te leh MZP General Hqrs. aiawhte pawh telin fuihna thu ṭha tak tak an sawi a. Saron Venga zirlai hlawtling thar 85 te hnenah lawmpuina thuziak an hlan a ni.