No.3174/2021-2022

Aizawl, the 26th November, 2021: Vawiin khan Pu C.C Lalchhuangkima, DC Khawzawl chuan Riangtlei Community Hall-a Riangtlei Branch YMA Platinum Jubilee (kum 75 tlin) lawmna hun chu khuallian niin a hmanpui.

Khuallian Pu C.C Lalchhuangkima chuan Riangtlei Branch YMA in Platinum Jubilee an thleng thei chu thinlung taka a lawmpui thu a sawi a. Jubilee thupui 'Aia Upa Zah' tih leh 'Taimakna' tihte chu tha a tih thu sawiin, thangthar zawkten aia upa zah an zir thar a pawimawh a, nu leh pa rilru tina thin ten malsawmna an dawng ngai lo a ni, a ti. Riangtlei chu khaw taima ti a hriat an nih ang ngeiin intodelh zel tur a tan la sauh sauh turin a fuih bawk.

Vawiina Platinum Jubilee lawmnaah hian chawhma dar 10:30 ah Jubilee Dar vuakna
hun hman a ni a. Hetah hian khuallian leh Riangtlei Branch YMA hruaitu ni tawh la
dam lai zawngin Jubilee Dar vuakna hun an hmang a. Hemi hnu hian Riangtlei Community Hall-ah 'Hruaitu Chawimawina Inkhawm' hman zui a ni a, Riangtlei YMA hruaitu ni lai leh ni tawhte chawimawina thuziak cheimawi hlan an ni a. Jubilee thupuite Pu Lalrelliana, Ex-President chuan a sawifiah bawk.

Platinum Jubilee lawmna program neih zawhah  Pu C.C Lalchhuangkima chuan Platinum Jubilee lungphun hawnna neiin, hemi zawh hian YMA Office ah YMA Branch hruaitute nen inkawmhona an nei nghal a ni.