Vawiin khan Regional Institute of Paramedical and Nursing Sciences (RIPANS), Zemabawk, Aizawl chuan Graduation and Lamp Lighting Ceremony an hmang a; Member Secretary, Mizoram State Planning Board, Pu P.L.Thanga, IAS (Rtd) chuan Khuallian niin a hmanpui.

B. Sc. Nursing first year zirlaite lamp lighting ceremony hi Ms. Lalfamkimi, Principal, Department of Nursing, RIPANS chuan hmangin, zirlai tharte chu tihtakzetna leh mahni inpumpekna nena zir turin a chah bawk.

Kum 2013 hian B.Sc. Nursing, B.Sc MLT leh B.Pharm atangin zirlai 76 an graduate a, Distinction-ah mi 2 leh First Division-ah mi 74 an pass a ni. He hun hi India ram hmarchhak State hrang hrang atanga Graduate tharte leh B.Sc. Nursing first year zirlai nu leh paten an hmanpui bawk.

RIPANS hi 1996-ah North Eastern Council-in India hmarchhak mite tana Paramedical leh Health Sciences bik zirna atana a din niin, April 2007 atang khan Sorkar laipuia Ministry of Health and Family Welfare hnuaiah a awm a. Tun dinhmunah Course hrang hrang- B.Sc. Nursing, B.Sc. Medical Laboratory Technology, B. Pharm, B.Sc. Radio Imaging Technology, B.Sc. Optometry & Ophthalmic Techniques-te awmin, India hmarchhak zirlaite tan seat hauhsa (quota) neiin, zirlai 583 an awm mek a ni. Director Dr. Chawngthanliana kaihhruaina hnuaiah Paramedical course chi hrang hrang 20 vel hawn belh tum niin, kum 2014 academic session atangin M.Pharm zirna hawn tura tihfel mek a ni a; tunah hian Academic Block, Girls Hostel, Boys Hostel leh Library building thar te sak tan mek niin; faculty leh staff 196 an awm mek a ni.