Vawiin chawhma dar 11:00 khan Revenue Minister Pu J.H. Rothuama chuan a bial chhung, Champhai Kanan Venga Govt. R. Hranga High School a RMSA Building, Rs. 21,49,000 senga sak zawh hlim chu a hawng a, he Building hi RCC, a chung Dyna-Roof a ni a, Room 4, Computer, Laboratory, Library leh Office te a awm a ni.

Hawnna thu sawiin Minister chuan India ram hi khawvel ram ropui zingah a in hlangkai tawh a, mahse mirethei te te, ni khata chaw vawi khat ei tur nei lo an tam avangin an in tun nun nan Ni 100 inhlawhna (MGNREGS) a duang chhuak a, India ram pumah a zar kan zo mek a ni. Chutiang bawkin zirna lama hma kan sawn theihna turin SSA Programme a kalpui mek laiin tunah hian RMSA a kalpui leh a, he programme ropui tak hi Champhai pawhin a zar kan zo a. Building tha tak kan neih theih phah ta a ni, a ti. Mizo te hi thluak nei tha tak kan ni a, kan kalna lamah chuan khawvel hmun dang ami te aiin kan hniam bik lo a ni, tiin zirlai te chu BA/MA satliah mai ni lovin Technical Line lama kal uar turin a chah a, Mizoram State chhunga hna tlemte inchuh mai lova State dang leh Ram pawn thlenga hna thawk thei tura in buatsaih turin a chah a ni.

Minister chuan Champhai hi Drugs tawlhrukna kalkawng a ni a, Drugs tawlh rutu ten engemaw zat kalkawnga an thlauh chu a zar kan zo a, thalai tam takin a ngawl an lo vei ta hi a pawi em em a ni, tiin Zirlaite leh thalaite chu he ruihhlo hlauhawm tak hi a chhin pawha ti lo turin a chah a, Ruihhlo dona kawnga hmalatu Sorkar mite bakah YMA leh NGO te thawhpui turin mitin a chah nghal a, hei bakah hian tunlaia natna hlauhawm AIDS laka fihlim turin Thalaite a chah bawk a, AIDS laka invenna tha ber chu ‘mahni’ theuh hi kan ni, a ti bawk.

RMSA Building hawnna inkhawm kaihruaitu Pu K. Lalrintluanga, DEO, DPC, RMSA ni bawk chuan Champhai District ah High School 32 a awm thu sawiin RMSA hnuaiah High School thar pahnih, Champhai Venglaiah leh Zokhawtharah din a ni tawh a, High School 25 te chu Strengthening niin tunah hian sak mek an ni hlawm a, a bak High School 5 te chu kumin hian kan tuam leh ang a, tichuan Champhai District chhunga High School te chu kan tuam zo thei tawh dawn a ni, a ti a, tuna Govt. R. Hranga High School hi Strengthening Prog. hnuaia hawn hmasak ber a ni, a ti. RMSA hnuaia hmalak dan sawiin High School tin te tanpui nan kum khatah Rs. 50,000 theuh pek an ni a, Minor Repair atan Rs. 25,000 theuh pek an ni bawk a, High School zawng zawngah an hmanrua te hman theiha englai pawha lo enkawltu tur Lab.Technician dah vek an ni, a ti.

Pu R.L. Malsawma, Dy.DPC, RMSA, Aizawl pawhin thu tawi sawiin RMSA hi kum 4 kalta atang khan kalpui tan a ni a, tunah chuan inkaihhruaina mumal tak nen kan kal tawh a, SSA angin zirlaibu, Uniform leh Chawchhun te kan sem ve loh avngin mipui hriatah kan lar ve hluai lova, mahse kan hmalakna chu Zirna In tha leh hmanraw tha pek a ni a, kan target chu tleirawl kum 14 -17 ten zirna tha tak an neih theihna atana hmalak a ni, a ti a, thingtlangah RMSA in Quarter 32 kuminah an sak tur thu a sawi a ni.

Vawiin chawhnu dar 1:00 vel khan Revenue Minister Pu J.H. Rothuama hian RMSA strengthening hnuaia Rs. 32,25,000 senga sak Govt. Ruantlang High School a hawng leh bawk a, he School ah hian Room 4 bakah Class Room 2 a tel a ni.