Sawrkar, Village Council hrang hrangte leh Tlawmngai pawl hrang hrang te ngenna ngaipawimawh lova Serchhip Town Vehicle Owners’ Association ten Serchhip khawpuia “No Vehicle Day” an kaltlang luih pui avangin District Bawrhsap Pu P.Lalchhuanga chuan STVOA President Pu Lalremsiama Kawlni hnenah lehkha thawnin insawifiah turin a hrilh.

District bawrhsap chuan nimin (March ni 8, 2012) chawhnu dar 3:00 a DC Committee Room a ama hova STVOA, PWD Department, Sub-Headquarters YMA, MUP, Village Council hrang hrangte leh Sawrkar official hrang hrangte nen sawihona an neihna ah sawitu dang zawng zawngin hemi kawng siamthatna atana Department hmalakna te hmuh theih a a awm tawh avanga “No Vehicle Day” kaltlangpui lova sut leh mai zawk tura an ngen hnu leh amah District Bawrhsap ngei pawhin a ngen avanga ngaihtha taka a awm tawh hnu a an ruahmanna an kaltlangpui lui chu hriatthiam har a tih thu a sawi a, National Highway an dan chah mai bakah Chhiahtlang atanga Sailiamkawn thleng hmun hrang hrangah kawng dangchat a, District dang te mamawh thlentu tur lirtheite pawh an ti ding te, zirlai ho Board exam lai a ani chung pawha harsatna an siam sak lui te chu Sawrkar mai nilovin mipuite zahlohna leh ngaihpawimawh lohna ni a a hriat thu a sawi bawk.

District Bawrhsap chuan a lehkhathawnah hian Deputy Commissioner, Serchhip Office record ah Serchhip Town Vehicle Owners’ Association (STVOA) hi a awm ve loh thu sawiin, Sawrkar hriatpui an ni lo tih a hrilh a, hei vang hian STVOA chu heng a hnuaia tarlan document leh information te March ni 12, 2012 (Thawhtanni) chawhma dar 11:30 ral hma ngeia a hnenah thehlut turin a hriattir a ni.

1) STVOA Registration Number

2) STVOA Constitution copy

3) STVOA din tan ni, thla leh kum

4) General Body Meeting neih ni leh Attendance Sheet (attendance sheet hi an nei anih chuan)

5) STVOA Office Bearer inthlanna neihpuitu Returning Officer hming leh designation

6) Inthlanna neih ni, a hmun leh a hun