Pu John Rotluangliana Deputy Speaker chuan vawiin khan MHIP Sub-Hqrs Mamit Conference vawi-12 na Dampui Community Hall-a neih chu khuallian niin a hmanpui.

Chawhma inkhawm, Pi L.R Zampuii President MHIP Sub Hqrs kaihhruaiah Deputy Speaker chuan thusawiin Zonunmawi inzirtir tur chuan chhungkaw tina nute hi in pawimawh ber a ni ti a, Mizo hmeichhia te dinhmun tarlangin an dinhmun chawisan ngawt ngaihtuah lova ram leh hnam dinchhuahna tur hian hmeichhia te hi in pawimawh a, nu leh pa dinhmun luah hnuah pawh nute zirtirna hi kan theihnghil ngai lo a ni tiin thangthar lo la awm leh zel turte tan pawha zirtirtu tha an nihna hria-a hmala sauh sauh turin MHIP members kalkhawm te a chah a ni. Khuallian chuan tunlai khawvelah hmeichhia ten dinhmun sang tak tak an chelh tawh thu tarlangin hemi kawngah hian mipate pawh kan in enlet a, kan in bihchian a tul tak zet a ni a ti a, kan society leh hnam kan chawikanna kawngah tha thlah lova theihtawp kan chhuah chuan ramin hma a sawn ang a, hnam ang pawhin kan dingchhuak ngei ang tiin he Mizo Hmeichhia Insuihkhawm Pawl hi Political Party inrawlhna ni lo, pawl thianghlim ni zel turin duhsakna sang ber a hlan bawk a ni.

Pu John Rotluangliana Deputy Speaker chuan Conference tanpui nan Rs. 5,000/- a hlan bawk a ni.

Khuallian chuan MHIP Sub Hqrs Mamit huam chhunga tun hnaia V/C Election a Hmeichhia, thlantlin mi 5 te hnenah MHIP Sub Hqrs Mamit in chawimawina Certificate a siamte a hlan nghal bawk a ni.

He MHIP Sub Hqrs Mamit Conference Vawi 12-na ah hian Thupui \" Mizo Tlawmngaihna chhawm nun\" tih hman niin Lengkhawm zaia intihsiakna buatsaih a ni a, Rorelna neiin Agenda 8 (pariat) passed niin kum 2012-2014 chhung tan hruaitu thar an thlang nghal bawk a ni.

Pu John Rotluangliana Deputy Speaker Bialtu MLA chuan nimin khan Damdiai V/C thar lawmna hun a hmanpui bawk a, he hunah hian Deputy Speaker chuan thusawiin tunah chuan khua tak tak in ni tawh a, khawtlang tana roreltu tura thlan chhuah te pawhin dik tak leh tha thei ang bera khawtlang tan hna in thawh a tul dawn a ni a ti a, khua an nih tawh avangin khawtlang mamawhte pawh a theih ang angin sawrkar in a ngaihtuah tur thu sawiin Western Development Fund atangin cheng nuaih 80 Damdiai khaw eng pekna turin ruahman a ni a ti bawk.

Bialtu MLA chuan khawtlang hruaitute khawchhung thianghlimna ngai pawimawh tur leh mipuite tan pawh entawn tlaka in vawngthianghlim turin a chah bawk a ni