Vawiin khan Observance of RTI Week 2019 chu I&PR Conference Hall, Mamit-ah Dr Lalrozama, IAS District Bawrhsap hovin hman a ni.

District Bawrhsap chuan RTI Week pual hun hmang tura kalkhawm Sawrkar mite, tlawmngaipawl hrang hrangte leh hun hmang tura sawmbikte chungah lawmthu a sawi a. RTI chu kan lo hmelhriat fo tawh a, kan hmang tangkai thin em tih chu mahni theuh inzawt ila, Sawrkar Officials-te leh Khawtlang hruaitute'n kan hna tur theuhte tha takin thawk tlang ila engmah harsatna tawklo tur kan ni a ti. RTI chu langtlang sawrkar siam tura duanchhuah a ni a. A hmang tangkai turte'n hman tangkai dan kan hriat a tul hle a ni a ti bawk.

Sawrkar Officials-te chu RTI hmanga zawhna kan dawnte a mamawhtute tana chhanna tling kan pek chu kan tihtur a ni tih kan inhriat thar a pawimawh thu sawiin chutihlaia kan tana tangkai tur em em ni silo leh kan tangkaipui zui tur ni em em bawk silo, hriat chak ve hrim hrim vanga Sawrkar Department-te hnena zawhna zawt thin ringawt ni lovin, Mipui leh Sawrkar linpawh tlang taka kan kal tlanna tura duan a ni tih hre tharin RTI 2019 puala hun hman chu kalkhawmte hmasawnna min thlentu atana kan hman theuh a duh thu a sawi a ni.

RTI Week pual hun hman hi Pu Paul Rokima, MIS, DIPRO chuan kaihruaiin Dr.Joseph C. Lalremruata Asst Professor, Govt. Mamit College chuan RTI chungchanga hriat tur hrang hrangte a lem nen a entir a. Kalkhawmte atangin zawhna leh chhanna hun hman a ni bawk.

He hunah hian Mamit khawpui chhunga SPIO, SAPIO Dealing Assistant leh tlawmngaipawl hrang hrang aiawhte an tel a ni.