October ni 5-12, 2019 chhunga Ram puma hman thin ‘Right to Information (RTI) Week’ chu vawiin khan Mizoram Information Commission leh Deputy Commissioner Office, Hnahthial tangkawp buatsaihin  Government Hnahthial College Auditorium ah hman a ni. Pu Lalduhthlana Ralte, State Chief Information Commissioner (SCIC) chu khuallian a ni. He hunah hian Mizoram Information Commission Secretary Pu Vanlalngena, Head of office te, tlawmngai pawl, khawtlang hruaitute, Hnahthial MJA-te leh zirlai rual thahnem tak an kalkhawm.

He hun Pu Vanlalmawia, Hnahthial DC kaihhruaiah Pu Lalduhthlana Ralte,SCIC chuan mipuite rorelna sawrkar (Democracy) leh RTI chu thil kal kawp tlat a ni tiin Sawrkar hmalakna leh hnathawhte hriat chu khua leh tui te chanvo a ni, a ti a. RTI Act chu Dan ropui tak anih thu leh he Dan siam anih laia sawrkar laipui Ministry of External Affairs aiawha Inter Ministerial Committee-ah alo tel thin tawh thu kalkhawmte a hrilh a. RTI Act hi ramchhung state dangte aiin Mizoram ah kan hman tlem thu sawiin SCIC chuan he Dan chungchang hi mipuite zingah inhrilhfiah chhunzawm zel a tul takzet a, a tangkai tur anga mipuiten an chhawr thiam theih nan inzirtirna chak taka kalpui chhoh zel a tul a ni, a ti. Mipui kalkhawmte chu RTI hnuaiah zawhna zawt hreh lo tura chahin RTI Act a nih dan tur taka tangkai taka hman theuh turin a sawm bawk.

Pu Vanlalngena, Secretary MIC chuan Keynote Address sawiin RTI Act chu sawrkar langtlang leh mawhphurhna hlen thei awm theihna tura duan a ni tiin he Dan tha tak hmang tangkai tur leh a nih dan tur taka hmang tur chuan a hman dan tur kal hmang chiang taka kan hriat theuh a tul a ni, a ti a. RTI Act hmanga zawhna dawngtu Department te pawhin RTI Act dah pawimawhin a hun bituk chhung ngeia zawhna chhang thin turin a chah bawk.

Program ah hian Workshop on RTI Act, 2005 neih zui nghal a ni a. He hunah hian Pu Lalduhthlana Ralte Chief Information Commissioner chuan MIC hmalakna tlangpui a tarlang a. Pu Vanlalngena, Secretary MIC, in RTI ACT hmanga mipuiten dilna an thehluh theih dan,  SPIO/SAPIO leh DAA te mawhphurhna leh an hriattur tul te a sawifiah a, RTI ACT hmanga sawrkar thu leh hla dil theih loh thenkhat te a sawifiah bawk. Pi C. Lalremruati, DIPRO Lunglei in lawmthu sawina hun a hmang bawk a ni.

Mipuiin Thuneitu (Public authority) te atanga thil hriat theihna chanvo an neih theih Dan RTI Act, 2005 hi Gazette of India-ah June ni 21, 2005 khan chhuah a nih hnuah October ni 12, 2005 atang khan rampumah hman tan a ni a. Mizoram sawrkar pawhin RTI Act hi kum 2006-ah hmang tan nghalin 29th June 2006 khan Mizoram Information Commission chu din a lo ni ta a. Kum 2006 atanga 31/09/2019 thleng hian Mizoramah RTI Application 16,139 a lut tawh a. Heng atang hian zualko vawikhatna (1st appeal) 177 awm tawhin, zualko vawihnihna (2nd appeal) 73 awmin Mizoram Information Commission-a complaint lut tawh hi a zavaiin 133 a ni. RTI Act chungchang hrechiang duh tan mic.mizoram.gov.in/ ah hrilhfiahna Mizo leh English-a chhiar tur a awm a ni.

Attachment

  • Loading attachment...