Kumtin ram pum huapa October ni 5 -12 chhung Right to Information (RTI) Week hman thin chu kumin pawh hman leh niin, vawiin khan he hapta pual hian Chief Minister Pu Zoramthanga hovin Synod Conference Centre-ah hun hman a ni. Mizoram district capital hrang hrangah RTI Week pual hian hun hman a ni bawk a. He hapta hi RTI hnuaia mipuiin an chanvo an hriatchian a an hman tangkai thar leh theih nan a siam a ni.

Chief Minister Pu Zoramthanga chuan langtlang taka sawrkar hmalaknate mipuiin an hriatpui theihna chu sawrkar rinawm a nih thu leh, chumi tihlawhtling tura RTI hmang tangkai theia kan awm chu mipui vanneihna a nih thu a sawi a. Sawrkar lama thawktute pawh an fimkhur phah zawkin, zep neih ngailo a hnathawh chu a tu tan pawh a hahdamtlak in a nuam zawk bawk a ni, a ti a. Chutihrual chuan RTI chu a nih dan tur ang taka hman a pawimawh thu sawiin, mi pawi sawi tumna emaw, tute tan emaw a hnawksak siam tumna hmanrua tur a nih loh thu a sawi a.

Chief Minister chuan sawrkar hnathawk information pechhuaktute pawh tha taka an mawhphurna hlenchhuak thin turin a chah a. Thangtharte vanneihna RTI chu tangkai taka hman chhoh zel a beisei thu leh, engtik emaw ni ah chuan RTI hman ngailo khawp a sawrkar inrelbawlna tha a la awm ngei a beisei thu Pu Zoramthanga chuan a sawi a ni.

Chief Information Commissioner Pu Lalduhthlana Ralte, IFS (Rtd.) chuan Right to Information Act tobul leh he Dan hnuaia mipuite chanvo hrang hrangte sawiin, sawrkar department tin a RTI zawhna lo bawhzuitute chu tan la zual tura fuihin, sawrkar inrelbat tha zawk siamna hmanrua pawimawh an nih thu a sawi a ni.

RTI puala inkhawm hi Information Commissioner Pu Zorammuana, IPS (Rtd.) chuan kaihruaiin, RTI chu democracy tinghettu a nih thu a sawi a ni. Vawiin hian DAA, SPIO leh SAPIO te pualin interactive session neih a ni bawk.

Vawiin inkhawmah hian RTI Week puala Slogan Writing Competition buatsaih a tithate hnenah lawmman sem a ni a. Lawmman dawngtute chu hengte hi an ni:

1) K. Lalnunsanga, 5th Sem, Govt. Hrangbana College, Dept. of Geography
"RTI (Right to Information) hmangin sawrkar inrelbawl dan hriat tum la, i ram siamthat nan hmang rawh."

2) C. Lalnunmawia, 5th Sem, Govt. Hrangbana College, Dept. Of English
"RTI (Right to Information) hmangin i ram siamtha la, i dikna chanvo humhalh nan lo hmang ve rawh."

3) Lalhruaitluanga, 5th Sem, Pachhunga University College, Dept. of Geology "Rinawmna Thudik I tan - Mipuiten kan dikna chanvo kan hai lan theih na hmanrua RTI (Right to Information) Act hmang hian Mizoram tan rinawmna kawng lo sial ve ngei ang che."

Kumin hi Mizorama RTI Week hman vawi 9-na a ni a. RTI (Right to Information) Act, 2005 hi India khua leh tui zawng zawng ten naupang atanga puitling, Non Resident Indian thleng huam tlein an hmang thei vek a, kum bithliah a awmlo a ni. Mipui leh sawrkar inkar zau lutuk tur hnuhhnaih nan te, information dil leh pekchhuah nan te a tangkai em em a. RTI hmanga zawhnate hi hun ruat chhunga chhan tur a ni a. SPIO chhannah zawttu a lungawilo a nih chuan chhanna a dawn atanga ni 30 chhungin Appellate Authority (DAA) hnenah a zualko thei a ni. RTI Act hnuaia hian corporation leh NGO, sawrkar atanga puihna dawngte chu huam tel a ni.