Vawiin chawhnu khan Calvary Comprehensive School, TNT Aizawl District High School Sport 2019 a Over-all champion an nih lawmna leh State Level Weightlifting Championship (Youth & Junior) 2019 a lawmman an lakte lawmna hun hman a ni a, Pu Robert Romawia Royte, Minister Sports & Youth Services department chu khuallian a ni.

Minister Pu Robert Romawia Royte chuan Calvary Comprehensive School, TNT chu Aizawl High School thahnem tak kara 2019 sports inelnaa Champion an ni chu lawmawm a tih thu a sawi a, "TNT naupangte zirna leh infiamna hrang hranga hma in sawn thin hi thawktute leh zirlaite inpekna leh thawhrimna a ni," a ti. Pu Robert Romawia Royte chuan TNT a zirlai leh naupangte chuan helai hmun an awm chhung hian an hunte tangkai taka hmang turin a chah a, buaina leh harsatna hrang hrang karah chhel taka paltlang tum tlat turin a chah a, infiamna kawnga an mamawhnaah Sports & Youth Services department chuan a theihna apiangah a puih tur thu a sawi bawk a ni. Minister chuan TNT naupangte chu hriselna ngai pawimawh turin leh Fit Mizoram program sawrkarin a kalpui mekah a hma hruaitu ni turin a chah a," Kan dam hun chhung hian midangte tana tangkai nih tum ila, kan chenpuite tan chenpui nuam nih tum turin tan ila thar theuh ang u," a ti bawk.

Dr Sangthankima, Founder Chairman TNT chuan, Kan mihringpuite pathian hnena kan hruai thlen hi mihring dam chhan pawimawh ber anih thu sawiin puih ngaite puih chu a inchhirawmloh thu leh malsawnna tam tak dawnna a nih thu a sawi bawk.

Vawiin champion lawmna hi Dr Sangthankima, Founder Chairman TNT in a kaihruaia, Pu F Lalvena, Headmaster CCS in report pein medal dawngte chawimawina hunte a hmang a, naupangten an thiam thil hrang hrang entirna hun an hmang bawk a ni.

Vawiin champion lawmnaah hian Pu Zothanmawia, Director, Sports & Youth Services department, Mizoram Judo Association leh Mizoram Weightlifting Association hruaitute, TNT adviser Pu Vanneihthanga, Pu John Lalpeka leh V Lalzawmliana te bakah TNT Headquarter, Muanna Veng a thawktute leh naupangte kim takin an tel a ni. Minister hian TNT hmun hmate fangkualin TNT naupangte leh thawktute kawm in hun a hmang a, harsatna an neihte leh hmalakpui dan turte a sawipui a ni.

Calvary Comprehensive School hian Aizawl district high school sports 2019 ah hian gold 9, silver 3 leh bronze medal 1 la in over-all champion an ni a, State level Weightlifting Championship (Youth & Junior) ah hian Youth (Girls) ah Team champion niin Youth (Boys) leh Junior (Boys) ah pahnihna dinhmun an la bawk a ni.

TNT Headquarter, Muanna Vengah hian naupang 414, Pangpar huanah mi 421, Deaddiction Centre-I ah mi 556, Deaddiction Centre-II ah mi 382 leh thawktu mi 82 awmin an vaiin mi 1855 an awm mek a ni. TNT Headquarter bakah hian Calvary Centre, Kolasib ah mi 230, Lunglei Home TNT ah mi 270, Mazuia Memorial, Champhai ah mi 353 leh Varpui, Tahanah mi 320 an awm bawk a ni.