Vawiin chawhma khan Lunglei Saikuti Hall ah World Vision India buatsaihin Rualbanlote hnenah naupang leh puitling te hman tur bungrua Pu Pc Lalthanliana, Social Welfare Minister chuan a sem.

Bungraw semna inkhawm Pu Thanglunpau Guite, Project Co-ordinator & CDC, Chhimtuipui ADP Word Vision India kaihhruaiah khuallian Pu P.C. Lalthanliana, Minister chuan thusawiin India Sorkarin Rualbanlote tan dan a siam a, Mizoram ah pawh People With Disability Commissioner office hawn pawh rualbanlote tana vanneihna a ni. Sorkar-in chak takin rualbanlote tan hma a la a ni, amaherawh chu sorkar in a ti vek seng lova, NGO, kohhran ten an thawhpui thin a, World Vision India hna thawh hi a ropui a, harsatna kan tawha tanpuitu nei lo te World Vision India in a tanpui thin a ni. Pathian-in World Vision India kaltlangin malsawmna min pe mek a ni. Malsawmna kan dawn atang hian tih theih lohna atanga tih theihna rilru kan put thar a ngai a ni a ti.

Pu Paul T. Touthang, Programme Manager, Chhimtuipui ADP, World Vision India pawhin pianphunga rualbanlo te an ngaih pawimawh thu sawiin Alimco, Social Justice & Empowerment, Govt. of India hnuai a peng pakhat nen tangkawpa programme buatsaihin rualbanlote tanpui dan ngaihtuah thin a ni a ti. Khawvel mihring 100 zela 10 atang a 15 hi rualbanlo an ni a, India ramah In 12 ah rualbanlo pakhat(1) awm ang a chhut a ni a, inzirtir na tha leh inenkawlna tha kan nei loh avangin rualbanlo kan tam a ni a ti. India sorkar pawh hian rualbanlo te chu ngai pawimawh a, SSA kaltlangin man chawi lova zirtirna pek thin a ni. SSA leh Social Welfare Dept. kaltlangin tanpuina pek thin a ni a ti bawk.

Pi G.Lalhmingthangi ,Dist. Social Welfare Officer, Lunglei pawh in thusawiin Social Welfare Deptt. in rualbanlo te tan a hamthatna an siam sak Rualbanlo pension te, Handicap Stipen zirlai H/S, M/S leh P/S te an pe a, Educated Unemployment hnuaiah kumtin stipen Rs.3000/- an pek thin bakah Handicap Training Centre ah Puanthui leh Pheikhawk siam zirtir thin a ni.

Rualbanlote hi HHFDC kaltlangin loan an pek thin bakah doctor hriatpuinain wheel chair, mitdel tiang, bengdar, tar tiang te a pe thin a , Mizoram sorkarin 3% reservation a siam sak bakah Transport Deptt. pawh in hmathatna a siam sak bawk a ni a ti. Pu P. C. Lalthanliana, Minister hian rualbanlo 71 te hnenah hian Wheel Chair-11, Bengdar- 50 pairs, Tianghawl-1, Mitdel Tiang-5, Mitdel chhiar zirna-1, Zakdo tiang-8 leh MSIED Kid ( Exercise lakna)-1 te a sem a ni.