Mizoram Excise & Narcotics Department (END), Anti-Narcotics Squad leh Zuangtui Veng Kumpuan Committee te chuan nimin ni 20 August, 2014 (Nilaini) zan khan Heroin gram 19 leh a neitu an man.

Excise & Narcotics Department, Anti-Narcotics Squad te Zuangtui Veng Kumpuan Committee te tangkawp hian Zuangtui Venga ruihhlo zuar thinte an vaina ah 20 August, 2014 zan dar 10:50 khan Lalneihthanga (25) s/o Hrangtawna (L), Falam, Myanmar (tuna Edenthar Veng a khawsa mek) hnen atangin Heroin gram 19 (hawng khat) an man. Lalneihthanga hian Heroin hi Aizawl ah a lo zuar kual nual tawh niin a sawi.

Heroin neitu Lalneihthanga chu NDPS Act, 1985 hnuaiah thubuai siam sak nghal a ni.

Ruihhlo dona kawnga khawtlang thawhpuina tha tak an neih thin avangin Excise & Narcotics Department chuan khawtlang hruaitute chungah lawmthu a sawi a ni.